নেশ্যনেল ডেস্ক, 6 মে' : দিল্লী চৰকাৰে বুধবাৰে বিভিন্ন চেন্টাৰত কোৱাৰান্টাইনত থকা তাবলিগী সদস্যসকলক মুক্তি প্ৰদান কৰিবলৈ নিৰ্দেশ প্ৰদান কৰিছে ৷ দিল্লীৰ গৃহ মন্ত্ৰী সত্যেন্দ্ৰ জেইনে এই নিৰ্দেশ প্ৰদান কৰে ৷
এই নিৰ্দেশত উল্লেখ থকা অনুসৰি, মাৰ্কাজ ঘটনা সন্দৰ্ভত যিসকল তাবলিগী সদস্যসকলৰ বিৰুদ্ধে তদন্ত কৰিব লাগিব সেইসকলক দিল্লী আৰক্ষীৰ জিম্মালৈ প্ৰেৰণ কৰা হ'ব ৷
নিৰ্দেশ অনুসৰি, অন্য লোকসকলক পুনে পুনে নিজ ৰাজ্যলৈ প্ৰেৰণ কৰা হ'ব ৷ এই সম্পৰ্কত ৰাজ্যসমূহৰ কমিছনাৰসকলৰ সৈতে সম্পৰ্ক ৰক্ষা কৰিবলৈ গৃহ মন্ত্ৰণালয়ক জনোৱা হৈছে ৷
চৰকাৰৰ মতে, দিল্লীৰ কোৱাৰান্টাইন চেন্টাৰত প্ৰায় 4,000 তাবলিগী সদস্য আছে ৷ ইয়াৰে 900 লোক দিল্লীৰ নিবাসী হোৱাৰ পৰিৱৰ্তে অন্য লোকসকলৰ অধিকাংশ তামিলনাডু আৰু তেলেংগানাৰ বুলি জানিব পৰা গৈছে ৷
এই লোকসকলৰ পৰিবহণ ব্যৱস্থাৰ বাবে দিল্লী চৰকাৰে ৰাজ্যসমূহৰ সৈতে যোগাযোগ ৰক্ষা কৰি আছে বুলি প্ৰকাশ ৷
উল্লেখ্য যে, এক ধৰ্মীয় উৎসৱত অংশগ্ৰহণৰ বাবে দিল্লী নিজামুদ্দিন মাৰ্কাজত একত্ৰিত হৈছিল হাজাৰ হাজাৰ তাবলিগী জামাত সদস্য ৷ ইয়াৰ পাচতে বহুলোক কৰ'ণা ভাইৰাছত আক্ৰান্ত হোৱাৰ ফলত সেই অঞ্চলটো হটস্পট হিচাপে পৰিগণিত হৈছিল ৷ এই সদস্যসকলৰ বহুতে স্বাস্থ্য কৰ্মীৰ সৈতেও অভদ্ৰ ব্যৱহাৰ কৰাৰ তথ্য লাভ কৰা হৈছিল ৷
তাবলিগীৰ পাচতে কৰ'ণা ভাইৰাছৰ সংক্ৰমণ বৃদ্ধি পোৱাৰ ফলত মুছলমান ধৰ্মাৱলম্বী লোকসকলক ইয়াৰ বাবে লক্ষ্য কৰি লোৱা হৈছিল বুলিও অভিযোগ উত্থাপন হৈছিল ৷
