অগ্নিকাণ্ডত জাহ গ'ল বহু চৰকাৰী নথিৰ লগতে এগৰাকী চি আই এছ এফ বিষয়া

অগ্নিকাণ্ডৰ ফলত সৱলীকৰণ আৰু সামাজিক ন্যায় মন্ত্ৰণালয়ৰ বিশেষভাৱে সক্ষম শাখাৰ বহুকেইটা কোঠালী ভস্মীভূত হোৱাৰ লগতে কাৰ্যালয়টোৰ বহুটো গুৰুত্বপূৰ্ণ নথি জুইৰ ফলত ধ্বংসপ্ৰাপ্ত হয় ৷

নিউজ ডেস্ক, 6 মাৰ্চঃ নতুন দিল্লীৰ চিজিঅ' কমপ্লেক্সস্থিত এক চৰকাৰী কাৰ্যালয়ত বুধবাৰে দিনৰ ভাগত সংঘটিত হয় এক ভয়ংকৰ অগ্নিকাণ্ডৰ ঘটনা ৷ কমপ্লেক্সটোৰ পণ্ডিত দীনদয়াল অন্তোদয়া ভৱনৰ পঞ্চম মহলাত সংঘটিত হয় অগ্নিকাণ্ডৰ ঘটনাটো ৷

অগ্নিকাণ্ডৰ ফলত সৱলীকৰণ আৰু সামাজিক ন্যায় মন্ত্ৰণালয়ৰ বিশেষভাৱে সক্ষম শাখাৰ বহুকেইটা কোঠালী ভস্মীভূত হোৱাৰ লগতে কাৰ্যালয়টোৰ বহুটো গুৰুত্বপূৰ্ণ নথি জুইৰ ফলত ধ্বংসপ্ৰাপ্ত হয় ৷ আনহাতে অগ্নিকাণ্ডৰ ফলত কেন্দ্ৰীয় ঔদ্যোগিক সুৰক্ষা বাহিনীৰ এগৰাকী উপ-পৰিদৰ্শক নিহত হয় বুলি দিল্লী আৰক্ষীৰ অগ্নিনিৰ্বাপক শাখাই প্ৰকাশ কৰিছে ৷ অগ্নিনিৰ্বাপক বাহিনীয়ে প্ৰকাশ কৰা অনুসৰি, বৈদ্যুতিক শ্বট-চাৰ্কিটৰ ফলতেই জুইৰ সূত্ৰপাত হৈছিল ৷

দিল্লী আৰক্ষীৰ অগ্নিনিৰ্বাপক শাখাৰ বিষয়া বিপিন কেন্টালে সংবাদ মাধ্যমৰ আগত এই কথা প্ৰকাশ কৰিছে ৷ বিষয়াগৰাকীয়ে প্ৰকাশ কৰা অনুসৰি অন্তোদয়া ভৱনৰ পঞ্চম মহলাত সুৰক্ষা বিষয়া হিচাপে কৰ্মৰত চি আই এছ এফৰ উপ-পৰিদৰ্শকগৰাকীক এম পি গাডোৰা বুলি জানিব পৰা গৈছে ৷ ভাৰতীয় বায়ু সেনাৰ প্ৰাক্তন বিষয়াগৰাকীয়ে 2008 চনত চি আই এছ এফ বাহিনীটোত যোগদান কৰিছিল ৷

অগ্নিকাণ্ডৰ ফলত বিভাগটোৰ বহুটো গুৰুত্বপূৰ্ণ নথি জ্বলি ছাই হোৱাৰ লগতে সুৰক্ষা বিষয়াগৰাকীক সংজ্ঞাহীন অৱস্থাত উদ্ধাৰ কৰিবলৈ সক্ষম হৈছিল অগ্নিনিৰ্বাপক বাহিনীৰ জোৱানসকলে ৷ পৰৱৰ্তী সময়ত উন্নত চিকিৎসাৰ বাবে বিষয়াগৰাকীক নতুন দিল্লীস্থিত সৰ্বভাৰতীয় আয়ুৰ্বিদ্যা প্ৰতিষ্ঠানত ভৰ্তি কৰোৱা হয় যদিও চিকিৎসকে মৃত ঘোষণা কৰে ৷

উল্লেখ্য যে, পূৰ্বে পৰ্যাৱৰণ ভৱন নামে খ্যাত পণ্ডিত দীনদয়াল অন্তোদয়া ভৱনত ভাৰতীয় বায়ু সেনাকে ধৰি অনাময় আৰু খোৱাপানী বিভাগ আৰু কেন্দ্ৰীয় বন বিভাগৰ তিনিটাকৈ শাখাৰ কাৰ্যালয় আছিল ৷ অৱশ্যে অগ্নিকাণ্ডৰ ফলত এইকেইটা কাৰ্যালয়ৰ কোনোধৰণৰ ক্ষতি হোৱা নাই বুলি প্ৰকাশ কৰিছে দিল্লীৰ অগ্নিনিৰ্বাপক বাহিনীয়ে ৷ উল্লেখ্য যে, ৰাতিপুৱা প্ৰায় 8 বাজি 45 মিনিটত জুইৰ সূত্ৰপাত ঘটিছিল আৰু অগ্নিনিৰ্বাপক বাহিনীয়ে 10 বজাৰ আগতেই জুই নিৰ্বাপন কৰিবলৈ সক্ষম হয় ৷