নিউজ ডেস্ক, ২৫ এপ্ৰিলঃ শুকুৰবাৰে বিহাৰত নীতিশ কুমাৰৰ চৰকাৰে দৰিদ্ৰ লোকক লক ডাউনৰ সময়ত সকাহ দিয়াত বিফল হৈছে বুলি উল্লেখ কৰে লোক জনশক্তি দলৰ সভাপতি চিৰাগ পাচৱানে । চিৰাগ পাচৱানে কয়, প্ৰায় ১৪.৫ লাখ লোকক বিহাৰত ৰেচন কাৰ্ড দিয়াত বিফল হৈছে বিহাৰৰ জে ডি ইউ চৰকাৰ । যাৰ বাবে এইসকল লোক কেন্দ্ৰৰ সাহায্যৰ পৰা বঞ্চিত হ'বলগীয়া হৈছে ।
কেন্দ্ৰই বাৰম্বাৰ অনুৰোধ কৰা সত্বেও বিহাৰ চৰকাৰে কোনো গঠনমূলক পদক্ষেপ গ্ৰহণ নকৰিলে । এই মাহৰ আৰম্ভণিতে কেন্দ্ৰীয় চৰকাৰে ৰাজ্য চৰকাৰক দৰিদ্ৰ যাৰ যাৰ ৰেচন কাৰ্ড নাই তেনে লোকৰ তথ্য় দিয়াৰ নিৰ্দেশ দিছিল । কিন্তু জে ডি ইউ চৰকাৰে কোনো পদক্ষেপ গ্ৰহণ নকৰিলে । বিহাৰৰ পৰা আচৰিত ভাৱে ১৪.৫ লাখ লোক আছে যাৰ হাতত ৰেচন কাৰ্ড নাই ।
লক ডাউনৰ ফলত দেশজুৰি বহু লোক এতিয়া অৰ্থনৈতিক সংকটত ভুগিবলগীয়া হৈছে । আনহাতে ৰেচন কাৰ্ড নথকাৰ বাবেই এতিয়া বহু লোক কেন্দ্ৰৰ সাহায্যৰ পৰা বঞ্চিত হ'বলগীয়া হৈছে ।
চিৰাগ পাচৱানৰ এই প্ৰতিক্ৰিয়া পিতৃ কেন্দ্ৰীয় মন্ত্ৰী ৰাম বিলাস পাচৱানে ৰাজ্য চৰকাৰ সমূহক দৰিদ্ৰ সকলক ৰেচন কাৰ্ডৰ যোগান ধৰাৰ পুনৰ আহ্বান কৰাৰ পাচতেই আহিছে । ৰাষ্ট্ৰীয় খাদ্য সুৰক্ষা আইনৰ অধীনতে কেন্দ্ৰই ৰেচন দিয়াৰ ব্যৱস্থা গ্ৰহণ কৰিছে । অৱশ্যে চিৰাগ পাচৱানে আশা প্ৰকাশ কৰিছে যে, আগন্তুক সময়ত এই ক্ষেত্ৰত নীতিশ কুমাৰ চৰকাৰে কিছু পদক্ষেপ কৰিব ।
