নেশ্যনেল ডেস্ক, 6 এপ্ৰিল : অৰুণাচল আৰক্ষীয়ে সোমবাৰে জানিবলৈ দিয়ে যে, চীনৰ পিপল'ছ লিবাৰেছন আৰ্মীয়ে 19 মাৰ্চত সুৱনশিৰি জিলাৰ মেকমোহন লাইনৰ পৰা অপহৰণ কৰা 21 বছৰীয়া অৰুণাচলী যুৱকজনৰ বৰ্তমানেও কোনো শুংসূত্ৰ লাভ কৰা নাই ৷
আৰক্ষী মহানিৰ্দেশক চুখু আপাই জানিবলৈ দিয়ে যে, জিলা আৰক্ষী অধীক্ষক তাৰো গোছাৰে নাচো আৰক্ষী চকীৰ দায়িত্বত থকা আৰক্ষী বিষয়াগৰাকীক ঘটনাস্থলীলৈ প্ৰেৰণ কৰিছে আৰু তদন্ত আৰম্ভ কৰিছে ৷
আপাই এই সম্পৰ্কত কয়, "যিহেতু সমগ্ৰ বিষয়টো বৈদেশিক মন্ত্ৰণালয়ৰ অধীনলৈ আহি গৈছে সেয়েহে ৰাজ্যিক চৰকাৰে সেই ধৰণে তদন্তত আগবাঢ়িব ৷"
এই ঘটনা সম্পৰ্কত সৈন্য বাহিনীৰ পূৱ কমাণ্ডোৰ মুখ্য কাৰ্যালয় কলিকতাৰ পৰা বৰ্তমানলৈকে কোনো প্ৰতিক্ৰিয়া প্ৰকাশ কৰা নাই ৷
উল্লেখ্য যে, মেকমোহন লাইন হৈছে চীন আৰু অৰুণাচল প্ৰদেশক বিভাজিত কৰা সীমান্ত ৷
অৰুণাচলৰ ছাত্ৰ সংগঠন ছিয়ুম নাচো লিমকিঙে এই যুৱকজনক অতি সোনকালে উদ্ধাৰৰ ব্যৱস্থা গ্ৰহণ নকৰিলে গণতান্ত্ৰিক আন্দোলনৰ হুংকাৰ প্ৰদান কৰিছে ৷
