নিউজ ডেস্ক, 29 ছেপ্টেম্বৰ: বহু বাধা-প্ৰত্যাহ্বানৰ অন্তত অৱশেষত আৰম্ভ হ’ল নাছাৰ মহাকাশচাৰী সুনীতা উইলিয়ামছৰ উদ্ধাৰ অভিযান । যাৰ নাম ক্ৰু-9 মিছন (ক্ৰু-9)। শনিবাৰে নিশা প্ৰায় 10.47 বজাত ফ্ল’ৰিডাৰ কেপ কানাভেৰেল মহাকাশ বাহিনী ষ্টেচনৰ পৰা উদ্ধাৰ অভিযান আৰম্ভ কৰা হয় । 26 ছেপ্টেম্বৰত আৰম্ভ হ’বলগীয়া এই অভিযান ঘূৰ্ণীবতাহ হেলেনৰ বাবে 28 ছেপ্টেম্বৰলৈ পিছুৱাই দিয়া হয় ।
পৃথিৱীলৈ উভতি আহিব সুনীতা
সুনীতা উইলিয়ামছ আৰু সহ- মহাকাশচাৰী বাচ্চ উইলম'ৰে চলিত বৰ্ষৰ 6 জুনত বয়িং ষ্টাৰলাইন মহাকাশযানেৰে মহাকাশ ভ্ৰমণ কৰিছিল । দুয়োজনে 8 দিনৰ বাবে মহাকাশলৈ গৈছিল । কিন্তু বয়িং ষ্টাৰলাইনৰ যান্ত্ৰিক বিজুতিৰ বাবে দুয়োজনেই নিৰাপদে আন্তঃৰাষ্ট্ৰীয় মহাকাশ কেন্দ্ৰ (আই এছ এছ)ত আশ্ৰয় গ্ৰহণ কৰিছে । অহা বছৰ 2025 চনৰ ফেব্ৰুৱাৰী মাহত তেওঁলোক পৃথিৱীলৈ ঘূৰি আহিব ।
Go #Crew9! A @SpaceX Dragon spacecraft is on its way to the @Space_Station following today's launch from Cape Canaveral Space Force Station in Florida. The new crew arrives at the orbiting lab Sunday, Sept. 29, for a five-month science mission: https://t.co/MGfQEm00Fd pic.twitter.com/sHtbOBEjlE
— NASA (@NASA) September 28, 2024
মহাকাশযানত সুনীতা আৰু উইলম'ৰৰ বাবে 2 খন খালী আসন
আমেৰিকাৰ মহাকাশ গৱেষণা সংস্থা নাছা আৰু বিশিষ্ট উদ্যোগপতি ইলন মাস্কৰ ৰকেট নিৰ্মাতা স্পেচএক্সৰ সহায়ত ক্ৰু-9 অভিযান আৰম্ভ কৰা হৈছে । নাছাৰ আন 2 জন মহাকাশচাৰী নিক হাফ আৰু ৰাছিয়াৰ মহাকাশচাৰী আলেকজেণ্ডাৰে এই অভিযানৰ নেতৃত্ব দিছে । মহাকাশযানখনৰ 4 খন আসনৰ ভিতৰত দুখন আসন সুনীতা আৰু তেওঁৰ সংগী উইলম’ৰৰ বাবে সংৰক্ষিত । অৰ্থাৎ এই মহাকাশযানখনত নিক আৰু আলেকজেণ্ডাৰ 2 খন আসনত বহিলেও আন দুখন আসন খালী থাকিব ।
ষ্টাৰলাইনত যান্ত্ৰিক বিজুতিৰ পিছত কি হ’ল?
যোৱা 6 জুনত সুনীতা উইলিয়ামছ আৰু সহযোগী বাচ্চ উইলম'ৰে মহাকাশলৈ গৈছিল । কিন্তু সফলতাৰে তাত উপস্থিত হোৱাৰ পাছত মহাকাশ যান ‘ষ্টাৰলাইনাৰ’ৰ পৰা হিলিয়াম গেছ নিৰ্গত হয় । ইয়াৰ বাহিৰেও আন কিছুমান যান্ত্ৰিক বিজুতি পোৱা গৈছিল । সেয়েহে এই 2 জন মহাকাশচাৰীয়ে পৃথিৱীলৈ ঘূৰি অহাৰ পৰিৱৰ্তে অধিক সময় মহাকাশত থকাৰ সিদ্ধান্ত লৈছিল ।
Falcon 9 launches Crew-9, the first human spaceflight mission to launch from pad 40 in Florida pic.twitter.com/BYpPPtaKqm
— SpaceX (@SpaceX) September 28, 2024
আনহাতে, যোৱা 6 ছেপ্টেম্বৰত মহাকাশৰ পৰা খালী হৈ উভতি আহিছিল ষ্টাৰলাইন । ইফালে নাছাই নিজৰ দুজন দক্ষ মহাকাশচাৰীক নিৰাপদে পৃথিৱীলৈ ঘূৰাই অনাৰ বাবে ক্ৰু-9 অভিযানৰ পৰিকল্পনা কৰিছিল । এই মহাকাশযানখন উৎক্ষেপণৰ বাবে ইলন মাস্কৰ ৰকেট নিৰ্মাতা স্পেচএক্সৰ সহায় লোৱা হৈছে । স্পেচ এক্সে নিৰ্মাণ কৰা মহাকাশ যানখনে সুনীতাক পৃথিৱীলৈ ঘূৰাই আনিব ।
