হায়দৰাবাদ: আজিৰ পৃথিৱীৰ সকলোৰে স্মাৰ্টফোনৰ প্ৰতি আকৰ্ষণ অধিক । আনকি শিশুসকলো ছ’চিয়েল মিডিয়াৰ প্ৰতি আসক্ত হৈ পৰিছে । ইয়াৰ উপৰিও শিশুসকল গেমিং আৰু অ’টিটি প্লেটফৰ্মৰ প্ৰতিও আকৰ্ষিত । শিশুসকলৰ আচৰণৰ পৰিৱৰ্তন হোৱাত অভিভাৱকসকলে উদ্বেগ প্ৰকাশ কৰিছে আৰু তেওঁলোকৰ মাজত ক্ৰোধ, অধৈৰ্য আৰু এলাহ বৃদ্ধি পোৱা পৰিলক্ষিত হৈছে । LocalCircles ৰ অনলাইন সমীক্ষাত এই কথা প্ৰকাশ পাইছে ।
সংস্থাটোৰ মতে, দেশৰ 368 খন নগৰ জিলাৰ পৰা 9-17 বছৰ বয়সৰ শিশুৰ 70 হাজাৰ অভিভাৱকৰ মতামত সংগ্ৰহ কৰি এই প্ৰতিবেদন প্ৰস্তুত কৰা হৈছে । 47% অভিভাৱকে কয় যে তেওঁলোকৰ সন্তানে দিনটোত গড়ে 3 ঘণ্টাৰ পৰা অধিক সময় ছ’চিয়েল মিডিয়া, ভিডিঅ’, অ’টিটি এপ আৰু অনলাইন গেমত কটায় । 10% অভিভাৱকে প্ৰকাশ কৰিছে যে কিছুমান শিশুৱে দিনটোত 6 ঘণ্টাৰো অধিক সময় কটায় । 66 % চহৰীয়া অভিভাৱকে বিশ্বাস কৰে যে তেওঁলোকৰ সন্তান ছ’চিয়েল মিডিয়াৰ প্ৰতি আসক্ত ৷
58% অভিভাৱকে অনুভৱ কৰে যে ইয়াৰ ব্যৱহাৰে শিশুৰ খং, অধৈৰ্য আৰু এলাহ বৃদ্ধি কৰিছে । 58% অভিভাৱকে কয় যে মোবাইলত বেছি সময় কটোৱাৰ ফলত শিশুসকল আগ্রাসী মনোভাৱৰ হৈ পৰিছে । 49% লোকে কয় যে শিশুসকল অধৈৰ্য হৈ পৰিছিল, 49% লোকে কয় যে শিশুসকল এলেহুৱা হৈ পৰিছিল, 42% লোকে কয় যে ইয়াৰ ফলত শিশুসকলৰ মনত হতাশাৰ সৃষ্টি হোৱা পৰিলক্ষিত হৈছিল আৰু 30% লোকে কয় যে শিশুসকলৰ খং অত্যধিক বৃদ্ধি পাইছিল । কিন্তু 19% অভিভাৱকে তেওঁলোকৰ সন্তানবোৰ সুখী বুলি কয় আৰু 4% অভিভাৱকে সামাজিকভাৱে সক্ৰিয় বুলি দাবী কৰে ।
অভিভাৱকৰ সন্মতি নিশ্চিত কৰা উচিত
66% অভিভাৱকে বিশ্বাস কৰে যে 18 বছৰৰ তলৰ শিশুৱে ছ'চিয়েল মিডিয়া ব্যৱহাৰ কৰিবলৈ অভিভাৱকৰ সন্মতি নিশ্চিত কৰিবলৈ নতুন ডাটা সুৰক্ষা আইন প্ৰণয়ন কৰিব লাগে । 33% অভিভাৱকে শিশুক কেৱল আধাৰ পৰীক্ষণৰ জৰিয়তেহে ছ’চিয়েল মিডিয়াত অনুমতি দিয়াৰ পৰামৰ্শ আগবঢ়ায় ।
