নিউজ ডেস্ক, 25 ছেপ্টেম্বৰ: বন্ধু-বান্ধৱৰ সৈতে ভ্ৰমণলৈ যোৱাটো সকলোৰে বাবে এক অবিস্মৰণীয় মুহূৰ্ত । যদি আপুনি বন্ধু-বান্ধৱীৰ সৈতে ছুটিৰ দিনত ভ্ৰমণলৈ যোৱাৰ পৰিকল্পনা কৰিছে তেন্তে ভ্ৰমণৰ বাবে প্ৰস্তুতি চলোৱাটো গুৰুত্বপূৰ্ণ । বন্ধু-বান্ধৱীৰ সৈতে ভ্ৰমণলৈ যোৱাৰ আগতে আপুনি কি কি দিশত গুৰুত্ব দিব লাগে, কি সামগ্ৰী লৈ যাব লাগে ইত্যাদি জানো আহক...
গাড়ীখন পৰীক্ষা কৰক: ভ্ৰমণৰ সময়ছোৱাত আপোনাৰ গাড়ীখনেই প্ৰধান, গতিকে ইয়াৰ অৱস্থা ভাল হোৱাটো নিশ্চিত কৰাটো গুৰুত্বপূৰ্ণ । ভ্ৰমণৰ কেইদিনমান আগতে গাড়ীখন মেকানিকৰ ওচৰলৈ লৈ গৈ সম্পূৰ্ণ পৰীক্ষা কৰক । গাড়ীৰ টায়াৰত পৰ্যাপ্ত পৰিমাণৰ বতাহ থকাটো নিশ্চিত কৰক । লগতে ভ্ৰমণলৈ যোৱাৰ সময়ত অতিৰিক্ত টায়াৰ সলনি কৰিবলৈ প্ৰয়োজনীয় সঁজুলিবোৰ লওক । গাড়ীখনত পৰ্যাপ্ত পৰিমাণৰ ইন্ধন, কুললাণ্ট, ব্ৰেক ফ্লুইড, উইণ্ডশ্বিল্ড ৱাশ্বাৰ ফ্লুইড থকাটো নিশ্চিত কৰক । অপ্ৰত্যাশিত কোনো ঘটনাৰ পৰা হাত সাৰিবলৈ বেটাৰী পৰীক্ষা কৰক । গাড়ীৰ চকা আৰু ব্ৰেক পৰীক্ষা কৰক । নিশ্চিত হওক যে সকলো হেডলাইট, টেইল লাইট, টাৰ্ণ চিগনেলে সঠিকভাৱে কাম কৰি আছে । ইয়াৰ পিছতহে আপুনি ভ্ৰমণলৈ যাওঁক ।
যাৱতীয় সকলো সামগ্ৰী সুন্দৰকৈ পেক কৰক: ভাল ভ্ৰমণৰ বাবে প্ৰয়োজনীয় সকলো বস্তু সঠিককৈ পেক কৰাটো যথেষ্ট গুৰুত্বপূৰ্ণ । নিজৰ মোবাইল ফোনটোৰ পৰা আৰম্ভ কৰি টয়লেটৰ সামগ্ৰী, ছানস্ক্ৰীণ, ছানগ্লাছ, চাৰ্জাৰ নিশ্চিতভাৱে লগত ৰাখক । গাড়ীৰ জৰুৰীকালীন কিটত প্ৰাথমিক চিকিৎসা কিট, জাম্পাৰ কেবল, টৰ্চলাইট, টায়াৰ মেৰামতিৰ সঁজুলি আৰু অতিৰিক্ত ফোন চাৰ্জাৰ আদি সামগ্ৰী পেক কৰক ।
কম্বল, আঁঠুৱা, হেডফোন দীঘলীয়া ড্ৰাইভৰ সময়ত কেতিয়াবা প্ৰয়োজনীয় হৈ পৰিব পাৰে । পানীৰ বটল আৰু জলপান লগত ৰখাটো উচিত ।
মনোৰঞ্জন: গাড়ীৰে দীঘলীয়া যাত্ৰা ভাগৰুৱা হ’ব পাৰে, গতিকে মনোৰঞ্জনৰ বাবে ব্যৱস্থা কৰক । সকলোৰে প্ৰিয় গীতৰ সৈতে এখন প্লে’লিষ্ট তৈয়াৰ কৰক, পডকাষ্ট বা অডিঅ'বুক ডাউনলোড কৰক । যদি আপোনাৰ ষ্ট্ৰীমিং চাবস্ক্ৰিপশ্যন আছে, তেন্তে ৰেষ্ট ষ্টপৰ সময়ত অফলাইন চাবলৈ আগতীয়াকৈ চিনেমা বা শ্ব’ ডাউনলোড কৰক ।
পথ নিৰ্দিষ্ট কৰাৰ লগতে জিৰণিৰ স্থানো নিৰ্দিষ্ট কৰক: ৰোড ট্ৰিপ আৰম্ভ কৰাৰ পূৰ্বে আপুনি কোনটো পথেৰে যাব সেই বিষয়ত এটা স্পষ্ট ধাৰণা ৰখাটো উচিত । আপোনাৰ যাত্ৰা উন্নত কৰিবলৈ জিপিএছ নেভিগেশ্যন ব্যৱহাৰ কৰক । বাটত খাদ্য গ্ৰহণ কৰাৰ লগতে জিৰণি লওক । গুগল মেপৰ দৰে এপে আপোনাক ট্ৰেফিক এৰাই চলিবলৈ আৰু পৰ্যটনৰ বাবে ভাল ঠাই বিচাৰি উলিয়াবলৈ সহায় কৰিব পাৰে । লগতে কেইঘণ্টামানৰ মূৰে মূৰে বিৰতি লৈ খাদ্য খোৱা আৰু ইন্ধন ভৰোৱাটোও প্ৰয়োজনীয় । কাৰণ অবিৰতভাৱে যাত্ৰা কৰিলে ভ্ৰমণ উপভোগ কৰিব নোৱাৰি, গতিকে কিছু সময় উলিয়াই জিৰণি লওঁক ।
দায়িত্ব ভগাই লওঁক: সম্পূৰ্ণ ট্ৰীপটো সাফল্যমণ্ডিত হ’বৰ বাবে প্ৰতিজন ব্যক্তিকে একো একোটা দায়িত্ব দিয়ক । উদাহৰণস্বৰূপে, নেভিগেশ্যনৰ দায়িত্ব এজন ব্যক্তিক অৰ্পণ কৰিব লাগে । লগতে প্লে’লিষ্ট বা মনোৰঞ্জনৰ দায়িত্ব আন এজন লোকক দিব লাগে । একাংশক জলপান আৰু খাদ্যৰ দায়িত্ব প্ৰদান কৰিব লাগে । এনেদৰে দায়িত্ব ভাগ কৰি দিয়াৰ ফলত ভ্ৰমণ অধিক উপভোগ্য হৈ পৰে ।
বাজেট নিৰ্ধাৰণ কৰক: ভ্ৰমণৰ পূৰ্বে বিত্তীয় বিষয় সন্দৰ্ভত আলোচনা কৰিলে ভাল । খাদ্য আৰু থকা তথা যাৱতীয় খৰচ কেনেকৈ ভাগ কৰিব সেইটো সিদ্ধান্ত লওক । টোল, পাৰ্কিং মাচুল আৰু অন্যান্য যিকোনো খৰচৰ কথা নাপাহৰিব ।
