মঙলদৈ, ২৭ জুলাই: মঙলদৈৰ নিকটৱৰ্তী বৰঙাবাৰী হাইস্কুলত শুক্ৰবাৰৰ পৰা আৰম্ভ হোৱা আৰ এছ এছৰ দৰং জিলা সমিতিৰ বৰ্গ কেম্পত যোৱানিশা বিকাশ দাস নামৰ এজন ১৭ বছৰীয়া কিশোৰৰ বৈদ্যুতিক শ্বৰ্ট চাৰ্কিটৰ ফলত মৃত্য়ু হোৱাক কেন্দ্ৰ কৰি শনিবাৰে এক উত্তপ্ত পৰিস্থিতিৰ সৃষ্টি হয় । এই কিশোৰজন বৰঙাবাৰী হাইস্কুলৰে শিক্ষাৰ্থী আছিল ।
কেনেকৈ সংঘটিত হৈছিল ঘটনাটো:
এজন স্থানীয় লোকে এই সন্দৰ্ভত কয়," শুক্ৰবাৰে সন্ধিয়া ৭ মান বজাত কেম্পৰ কাম-কাজ সমাপ্ত কৰি বিদ্যালয়খনৰে দমকলত হাত-মুখ ধুবলৈ গৈছিল বিকাশ দাসে । সেই সময়তে দমকলটোত সংযোগ হৈ থকা মটৰটোৰ বিসংগতি হোৱাত বিকাশ দাস অচেতন হৈ পৰে । লগে লগে কিশোৰজনক মঙলদৈ অসামৰিক চিকিৎসালয়লৈ নিয়া হয় যদিও চিকিৎসকে তেওঁক মৃত ঘোষণা কৰে । " ৰাইজে আজি এই সন্দৰ্ভত অভিযোগ উত্থাপন কৰি কয়," দুই বছৰ আগৰে পৰা দমকলটোত সংযোগ হৈ থকা মটৰটোৰ বিসংগতি হৈ আছিল ।"
"এই লৈ মৃত কিশোৰ বিকাশ দাসে বিদ্যালয় প্ৰধানক পূৰ্বতে অভিযোগ দিছিল । কিন্তু বিদ্যালয় প্ৰধানে এইক্ষেত্ৰত ব্য়ৱস্থা গ্ৰহণ কৰাৰ পৰিৱৰ্তে বিকাশক আনকি এই অভিযোগৰ বাবে বিদ্যালয় চৌহদতে কানত ধৰাই আঠু কঢ়াইছিল ।" আজি একাংশ লোকে এই বুলি অভিযোগ উত্থাপন কৰে ।
বিদ্যালয়ৰ চৌহদতে মৃতদেহ সৎকাৰ কৰিব খুজিছিল ৰাইজে:
ইফালে, ক্ষুব্ধ স্থানীয় ৰাইজে বিদ্যালয়ৰ চৌহদতে প্ৰথমতে বিকাশৰ মৃতদেহ সৎকাৰৰ প্ৰস্তুতি চলাইছিল । দুপৰীয়া ১২ বজালৈ বিদ্যালয়ত কোনো শিক্ষক উপস্থিত নোহোৱাত ৰাইজৰ মাজত ক্ষোভৰ সৃষ্টি হয় । ৰাইজে এই ঘটনাৰে জড়িত লোকক শাস্তি প্ৰদান কৰিবলৈ দাবী জনাই বিকাশৰ মৃতদেহ সৎকাৰৰ প্ৰস্তুতি চলাই যদিও জিলা প্ৰশাসন আৰু স্থানীয় ৰাইজৰ মাজত হোৱা আলোচনামৰ্মে মৃতদেহটো ৰাজহুৱা স্মশানত সৎকাৰ কৰাৰ ব্যৱস্থা কৰা হয় । স্থানীয় ৰাইজে কিশোৰজনৰ পৰিয়ালক আৰ্থিক সাহাৰ্যৰ লগতে সংস্থাপন ব্যৱস্থা কৰিবলৈ মুখ্য়মন্ত্ৰী ড৹ হিমন্ত বিশ্ব শৰ্মালৈ এখন স্মাৰক পত্ৰ প্ৰেৰণ কৰে ।
