নগাঁও,১৩ অক্টোবৰ : ৰাজ্যবাসী দুৰ্গা পূজা আৰু শংকৰদেৱৰ আবিৰ্ভাৱ তিথিক লৈ ব্যস্ত হৈ থকাৰ সময়তে নগাঁৱৰ পৰা আহিছে এক উদ্বেগজনক খবৰ । জিলাখনৰ প্ৰায় ১৯ গৰাকীকৈ শ্ৰমিক অৰুণাচলত আৱদ্ধ হৈ পৰিছে । ঘৰলৈ আহিবলৈ কোম্পানীৰ মালিকক দিব লাগে ৮ লাখ টকা । হাহাকাৰ অৱস্থা শ্ৰমিকসকলৰ পৰিয়ালৰ মাজত । অৱশেষত নগাঁও আৰক্ষীৰ কাষ চাপিছে ভুক্তভোগী শ্ৰমিকসকলৰ পৰিয়াল ।
অৰুণাচলত হাৰাশাস্তিৰ সন্মুখীন শ্ৰমিকসকল
জানিব পৰা মতে পেটৰ তাড়নাত শ্ৰমদানৰ বাবে নগাঁৱৰ কচুৱা অঞ্চলৰ পৰা দৰিদ্ৰ পৰিয়ালৰ প্ৰায় ১৯ গৰাকীকৈ যুৱক চুবুৰীয়া ৰাজ্য অৰুণাচল প্ৰদেশলৈ গৈছিল । পকী পথ নিৰ্মাণৰ কাম কৰিবলৈ দুমাহ পূৰ্বে যুৱককেইজনক এজন ঠিকাদাৰে অৰুণাচললৈ লৈ গৈছিল ৷ অৰুণাচল প্ৰদেশৰ দিবাং ভেলী জিলাৰ অতি ভিতৰুৱা অঞ্চলত কৰ্মৰত শ্ৰমিকসকলে বৰ্তমান অতি কষ্টৰে জীৱন অতিবাহিত কৰিবলগীয়া হৈছে বুলি পৰিয়ালৰ লোকসকলে অৱগত কৰিছে ৷ পৰিয়ালৰ অভিযোগ অনুসৰি শ্ৰমিককেইজনে খাদ্যৰ সংকটত পৰিছে । পথ নিৰ্মাণকাৰী প্ৰতিষ্ঠানটোৱে তেওঁলোকক খাদ্যৰ যোগান ধৰা নাই বুলি অভিযোগ কৰিছে । ইফালে তেওঁলোকে ঘৰলৈ আহিবলৈ বিচাৰিছে যদিও কোম্পানী কৰ্তৃপক্ষই বাধা প্ৰদান কৰিছে ।
৮ লাখ টকা দাবী
কেৱল এয়াই নহয় কোম্পানীটোৰ কৰ্তৃপক্ষই তেওঁলোকক মৃত্যুৰ ভাবুকি দিয়াৰো অভিযোগ উঠিছে । নানা হাৰাশাস্তি কৰাৰ লগতে শ্ৰমিককেইজনক ঘৰলৈ অহাৰ বিনিময়ত ৮ লাখ টকা দাবী কৰিছে বুলি তেওঁলোকৰ পৰিয়ালে জনাইছে । যাৰ ফলত মানসিকভাৱে ভাগি পৰিছে শ্ৰমিককেইজনৰ পৰিয়াল । অৱশেষত কচুৱা থানালৈ আহি পৰিয়ালকেইটাই আৰক্ষীক সকলো কথা অৱগত কৰে ৷ আৱদ্ধ হৈ থকা শ্ৰমিকসকল কচুৱাৰ পমিলা, চিতলমাৰী, তামোলবাৰী আৰু মৰিগাঁৱৰ বুলি জানিব পৰা গৈছে ।
মুখ্যমন্ত্ৰীক অনুৰোধ পৰিয়ালৰ
সংবাদ মাধ্যমৰ জৰিয়তে ভুক্তভোগী শ্ৰমিকৰ পৰিয়ালে অসমৰ মুখ্যমন্ত্ৰীৰো সহায় বিচাৰিছে । তেওঁলোকক উদ্ধাৰ কৰি ঘৰলৈ আনিবলৈ পৰিয়ালকেইটাই অসমৰ মুখ্যমন্ত্ৰী ড৹ হিমন্ত বিশ্ব শৰ্মাক কাতৰ আহ্বান জনাইছে ।
লগতে পঢ়ক :মৰিগাঁও জিলা কাৰাগাৰৰ জেইলাৰক নিলম্বন
