গুৱাহাটী, 27 জুন: পৰৱৰ্তী পাঁচদিনলৈ উত্তৰ-পূৰ্বাঞ্চলৰ লগতে অসমত অব্যাহত থাকিব বৃষ্টিপাত ৷ বতৰৰ এই আগলি বতৰা দিছে বৰঝাৰস্থিত আঞ্চলিক বতৰ বিজ্ঞান কেন্দ্ৰই ৷ সাগৰপৃষ্ঠত উৎপত্তি হোৱা ধুমুহাৰ ফলত উত্তৰ পূৰ্বাঞ্চলৰ লগতে ৰাজ্যতো প্ৰভাৱ পৰিব বৰষুণৰ ৷
বতৰ বিজ্ঞান কেন্দ্ৰই জাৰি কৰা নিৰ্দেশনা অনুসৰি, 28 জুনলৈ অসম, মেঘালয়, অৰুণাচল প্ৰদেশ, নাগালেণ্ড, মণিপুৰ, মিজোৰাম আৰু ত্ৰিপুৰাৰ কিছু কিছু অঞ্চলত ধাৰাসাৰ বৰষুণৰ লগতে বিজুলী-ঢেৰেকণি হোৱাৰো সম্ভাৱনা আছে ৷
ঠিক তেনেদৰে, 29 আৰু 30 জুনত অসম-মেঘালয়ৰ লগতে উত্তৰ পূৰ্বাঞ্চলৰ ৰাজ্যসমূহৰ কিছু কিছু ঠাইত ধাৰাসাৰ বৰষুণ হোৱাৰ সম্ভাৱনা প্ৰবল ৷ নিৰ্দেশনা অনুসৰি, প্ৰথম দুদিনত অসম, মেঘালয়, অৰুণাচলৰ কেইবাটাও প্ৰান্তত মধ্যমীয়া বৰষুণ হোৱাৰ পূৰ্ণ সম্ভাৱনা থকা বুলি বতৰ বিজ্ঞান কেন্দ্ৰই জনাইছে ৷ সমান্তৰালকৈ নাগালেণ্ড, মণিপুৰ, মিজোৰাম আৰু ত্ৰিপুৰাতো মধ্যমীয়া বৰষুণৰ আশংকা প্ৰকাশ কৰা হৈছে ৷
পৰৱৰ্তী তিনিদিনত সাতভনীৰ আটাইকেইখন ৰাজ্যতে মজলীয়া বৰষুণৰ সম্ভাৱনা ব্যক্ত কৰিছে আঞ্চলিক বতৰ বিজ্ঞান কেন্দ্ৰই ৷ আনহাতে, দ্বিতীয় আৰু চতুৰ্থটো দিনত অসম, অৰুণাচলৰ দুই-এক স্থানত প্ৰবল বৃষ্টিপাতৰ সম্ভাৱনা আছে ৷
উৎকট গৰমৰ পৰা কিছু পৰিমাণে সকাহ দিব এই বৰষুণে ৷ সাগৰীয় ধুমুহাৰ ফলতে ৰাজ্যত সলনি হ’ব বতৰৰ ৰূপৰেখা ৷ এই ধুমুহাজাক পশ্চিমবংগৰ পৰা অসম হৈ গতি কৰিব মণিপুৰলৈ ৷ যাৰ প্ৰভাৱৰ অসমৰ লগতে উত্তৰ পূৰ্বাঞ্চলৰ আন আন ৰাজ্যসমূহত বৰষুণ হ’ব ৷
উল্লেখ্য যে, বিগত সময়ত নেৰানেপেৰা বৰষুণৰ ফলতে ৰাজ্যত সৃষ্টি হৈছিল বান পৰিস্থিতি ৷ শেহতীয়াকৈ কিছু পৰিমাণে ৰাজ্যৰ বান পৰিস্থিতি উন্নত হোৱা দেখিবলৈ পোৱা গৈছে ৷
