টীয়ক,২১ জুলাই: যোৱা দহটা বছৰে উজনি অসমৰ যোৰহাট বাইপাছৰ পৰা জাঁজী পৰ্যন্ত ৩৯ কিলোমিটাৰ ৰাষ্ট্ৰীয় ঘাইপথৰ কাম সম্পূৰ্ণ কৰিব নোৱৰা এন এইচ আই ডি চি এলে এতিয়া খৰতকীয়াকৈ অব্যাহত ৰাখিছে টীয়কৰ মেলঙৰ সমীপত টোলগেট নিৰ্মাণৰ কাম ৷ যাক লৈ এতিয়া ব্যাপক প্ৰতিক্ৰিয়াৰ সৃষ্টি হৈছে সমগ্ৰ উজনি অসমত । বিভিন্ন দল-সংগঠন তথা সচেতন ৰাইজৰ সমান্তৰালকৈ যোৰহাট জিলাৰ মেলেঙত স্থাপন কৰিবলৈ ওলোৱা এই টোলগেটৰ নিৰ্মাণ কাৰ্য অবৈধ বুলি দাবী কৰে বীৰ লাচিত সেনাই ।
উল্লেখযোগ্য যে পথ পৰিবহণৰ কেন্দ্ৰীয় মন্ত্ৰী নীতিন গাডকাৰীয়ে ৰাষ্ট্ৰীয় ঘাইপথত স্থাপন কৰা টোলগেট সমূহৰ দূৰত্ব ৬০ কিলোমিটাৰৰ ব্যৱধান হোৱাটো বাঞ্চনীয় বুলি সদনৰ মজিয়াত উল্লেখ কৰিছিল আৰু ৬০ কিলোমিটাৰতকৈ কম দূৰত্বত স্থাপন কৰা টোলগেটসমূহ অবৈধ আৰু ইয়াক উঠাই দিব লাগে বুলিও মতপোষণ কৰিছিল গাডকাৰীয়ে । কিন্তু কেন্দ্ৰীয় মন্ত্ৰীগৰাকীৰ এই মন্তব্যক অংগুষ্ঠ প্ৰদৰ্শন কৰি নীতি বহিৰ্ভূতভাৱে নিৰ্মাণ অব্যাহত আছে মেলেঙৰ ৩৭ নং ৰাষ্ট্ৰীয় ঘাইপথৰ টোলগেটখনৰ কাম ।
যিখন টোলগেট আৰু গোলাঘাট জিলাৰ ৰঙামাটিত সাজি উলিওৱা টোলগেটৰ মাজত দূৰত্ব মাত্ৰ ৪৭ কিলমিটাৰ । তথ্য জনা অধিকাৰ আইনৰ তথ্য অনুসৰি, সমগ্ৰ দেশৰ ১৮৯ খন টোলগেট আইন বহিৰ্ভূতভাৱে নিৰ্মাণ কৰা হৈছে আৰু ইয়াৰে চাৰিখন টোলগেট অসমৰ । সেয়ে নীতি বহিৰ্ভূতভাৱে নিৰ্মাণ কৰা এই টোলগেটৰ নিৰ্মাণ বন্ধ কৰাৰ দাবী বীৰ লাচিত সেনাৰ লগতে স্থানীয় ৰাইজৰ । এই টোলগেটৰ নিৰ্মাণ বন্ধ নকৰিলে অনাগত দিনত প্ৰতিবাদী কাৰ্যসূচী ৰূপায়ণৰো হুংকাৰ দিয়ে সংগঠনটোৱে ।
