ডিব্ৰুগড় : নাগালেণ্ডৰ নগা উগ্ৰপন্থী সংগঠনে অসমভূমিৰ পৰা এজন ব্যৱসায়ীক অপহৰণ কৰি নিয়া ঘটনাৰ আজি যৱনিকা পৰিল । নগা উগ্ৰপন্থী সংগঠন NSCN/GPRN-এ শনিবাৰে মুকলি কৰি দিলে চৰাইদেউৰ অসম-নাগালেণ্ড সীমান্তৱৰ্তী নামতোলাৰ পৰা অপহৰণ কৰি নিয়া ব্যৱসায়ী মুছলেক আলীক । নিষিদ্ধ ড্ৰাগছৰ বেহা চলোৱাৰ অভিযোগত অস্ত্ৰধাৰী নগা উগ্ৰপন্থী সংগঠনে নিজা ব্যৱসায়িক প্ৰতিষ্ঠানৰ পৰাই অপহৰণ কৰি লৈ গৈছিল মুছলেক আলীক ।
ইতিমধ্যে সকলোৰে জ্ঞাত যে, যোৱা ২৫ নৱেম্বৰৰ সন্ধিয়া নামতোলা আৰক্ষী চকীৰ নিচেই কাষৰ পৰা নগা দুৰ্বৃত্তই গুলী ফুটাই অপহৰণ কৰিছিল মুছলেক আলী নামৰ অসমৰ ব্যৱসায়ীজনক । মুছলেক আলী নামৰ লোকজনক নিজা ব্যৱসায় প্ৰতিষ্ঠানত বহি থকা সময়তে উক্ত দিনা সন্ধিয়া নামতোলা আৰক্ষী থানাৰ পৰা ১০০ মিটাৰ আঁতৰতে অস্ত্ৰধাৰী দুৰ্বৃত্তই অপহৰণ কৰি এখন বগা ৰঙৰ টাটা চুম'ত লৈ গৈছিল ।
ব্যৱসায়ীজনৰ দোকানৰ সন্মুখত এটা গ্ৰেণেডো এৰি গৈছিল দুৰ্বৃত্তৰ দলটোৱে । এই অপহৰণৰ ঘটনাৰ সমগ্ৰ দৃশ্য বন্দী হৈছিল CC TV কেমেৰাত । নগা দুৰ্বৃত্তই গুলীচালনা কৰি নাগালেণ্ডৰ পৰা আহি অসমৰ ভূমিত সংঘটিত কৰা এই ঘটনাক লৈ ৰাজ্যজুৰি তীব্ৰ প্ৰতিক্ৰিয়াৰ সৃষ্টি হৈছিল ।
মুছলেক আলীৰ মুক্তিৰ বাবে নগা বিদ্ৰোহী সংগঠনে দাবী কৰিছিল ২৫ লাখ টকা । কিন্তু তেনে সময়ত অপহৃত মুছলেক আলীক বিনাচৰ্তে মুক্তিৰ দাবীত চৰাইদেউৰ নামতোলাত নাগালেণ্ড সংযোগী মূল পথ অৱৰোধ কৰি দিছিল অসমৰ দল-সংগঠনে ।
৯ নৱেম্বৰত মুছলেক আলীক মুক্তি দিয়াৰ দাবীত নাগালেণ্ডৰ বিৰুদ্ধে পথ অৱৰোধ কৰিছিল অসমৰ দল-সংগঠনে । পথ অৱৰোধৰ ফলত সম্পূৰ্ণৰূপে অচল হৈ পৰিছিল চুবুৰীয়া ৰাজ্য নাগালেণ্ডৰ মন জিলাৰ সৈতে যাতায়ত । ইয়াৰ পাছতে আজি পুৱাই নগা উগ্ৰপন্থী সংগঠনটোৱে মুছলেকক মুকলি কৰি দিয়াৰ কথা এক ভিডিঅ' বাৰ্তাৰ জৰিয়তে সদৰী কৰে ৷
লগতে অসম-নগালেণ্ড সীমান্তত ভৱিষ্যতে কোনো লোকে অবৈধ ড্ৰাগছৰ বেহা চলালে চূড়ান্ত শাস্তি বিহা হ'ব বুলি সকীয়নিও প্ৰদান কৰিছে GPRN-এ এখন পত্ৰৰ জৰিয়তে ।
