ধিং, ১১ অক্টোবৰ : শাৰদীয় দুৰ্গা পূজাৰ উলহ-মালহৰ মাজতেই মৰিগাঁও জিলা কাৰাগাৰৰ পৰা দেৱালৰ ওপৰেৰে POCSO গোচৰত অভিযুক্ত পাঁচটাকৈ কাৰাবন্দীয়ে পলায়ন কৰাৰ পিছতেই আৰক্ষীৰ মাজত লাগিছে হাহাকাৰ । তোলপাৰ লাগিছে মৰিগাঁও জিলাত । নিৰাপত্তাৰক্ষীৰে গিজগিজাই থকা মৰিগাঁও জিলা কাৰাগাৰৰ পৰা একেলগে পাঁচটাকৈ কয়দীয়ে পলায়ন কৰিলে কেনেকৈ তাক লৈ চলিছে চৰ্চা ।
কাৰাগাৰৰ জেইলাৰ নিলম্বন
মৰিগাঁও আদালতত গোচৰ চলি থকা পাঁচ অভিযুক্তই মহাসপ্তমীৰ নিশা হঠাৎ কাৰাগাৰৰ পৰা পলায়ন কৰাৰ পাছত কাৰাগাৰ কৰ্তৃপক্ষৰ বিৰুদ্ধে গাফিলতিৰ অভিযোগ উত্থাপন হয় । এই অভিযোগৰ পিছত কাৰাগাৰৰ জেইলাৰ প্ৰশান্ত শইকীয়াক বিভাগে নিলম্বন কৰে ।
উল্লেখ্য যে কেইদিনমান পূৰ্বে মৰিগাঁও জিলাৰ ছাইফুদ্দিন আহমেদ, জিয়াৰুল হক, নুৰ ইছলাম, মফিদুল ইছলাম আৰু আব্দুল ৰছিদ নামৰ পাঁচ অভিযুক্তক POCSO গোচৰত জে'ল হাজোতলৈ প্ৰেৰণ কৰা হৈছিল । এই ঘটনা সন্দৰ্ভত মৰিগাঁও জিলা কাৰাগাৰ কৰ্তৃপক্ষই জিলা আৰক্ষী অধীক্ষকলৈ প্ৰেৰণ কৰা এক পত্ৰত উল্লেখ কৰা তথ্য অনুসৰি জিলাখনৰ লাহৰীঘাটৰ মাহৰমাৰি পথাৰৰ ছাইফুদ্দিন আহমেদক POCSO গোচৰত লাহৰীঘাট আৰক্ষীয়ে 173/24 নম্বৰত গোচৰ ৰুজু কৰি ৩১ আগষ্টত গ্ৰেপ্তাৰ কৰিছিল । ইয়াৰ পিছতেই ছাইফুদ্দিনক প্ৰেৰণ কৰিছিল জেল হাজোতলৈ ।
একেদৰে শোণিতপুৰ জিলাৰ মিছামাৰী আৰক্ষী থানাৰ অন্তৰ্গত কলাকুছি গাঁৱৰ জিয়াৰুল ইছলামক মৰিগাঁও জিলাৰ মিকিৰভেটা আৰক্ষী থানাত 119/24 নম্বৰত ৰুজু হোৱা POCSO গোচৰত গ্ৰেপ্তাৰ কৰিছিল । যোৱা ২২ আগষ্টত জিয়াৰুলক প্ৰেৰণ কৰিছিল জেল হাজোতলৈ ।
ইপিনে, যোৱা ১২ আগষ্টত মৰিগাঁও জিলাৰ লাহৰীঘাট আৰক্ষী থানাৰ অন্তৰ্গত আমাৰাগুৰিৰ নুৰ ইছলামকো 210/23 নম্বৰত ৰুজু হোৱা POCSO গোচৰত প্ৰেৰণ কৰা হৈছিল জেল হাজোতলৈ । মৰিগাঁও জিলাৰ মৈৰাবাৰীৰ বৰথল কছাৰীগাঁৱৰ মফিদুল ইছলামক মৈৰাবাৰী আৰক্ষী থানাত ১৪ আগষ্টত 168/23 নম্বৰত ৰুজু হোৱা POCSO গোচৰত গ্ৰেপ্তাৰ কৰি জেল হাজোতলৈ প্ৰেৰণ কৰিছিল ।
লাহৰীঘাট দেৱগুৰি গাঁৱৰ আব্দুৰ ৰচিদক যোৱা ২৮ মে’ত লাহৰীঘাট আৰক্ষী থানাত 105/2024 নম্বৰত ৰুজু হোৱা POCSO গোচৰত গ্ৰেপ্তাৰ কৰি জেল হাজোতলৈ প্ৰেৰণ কৰা হৈছিল ।
মৰিগাঁও আদালতত বিচাৰ প্ৰক্ৰিয়া চলি থকাৰ সময়তেই বৃহস্পতিবাৰে নিশা নিজৰ কম্বল, লুঙি আদিৰে ৰচীৰ দৰে পকাই কাৰাগাৰৰ দেৱাল বগাই পলায়ন কৰিবলৈ সক্ষম হয় আটাইকেইটা অভিযুক্ত । POCSO গোচৰৰ পাঁচটাকৈ অভিযুক্ত কাৰাগাৰৰ পৰা পলায়ন কৰাৰ পাছতে পলাতক অভিযুক্তক বিচাৰি এতিয়া হাহাকাৰ কৰিছে মৰিগাঁও আৰক্ষী । আনহাতে এই সমস্ত ঘটনাৰ এক দণ্ডাধীশ পৰ্যায়ৰ তদন্তৰো নিৰ্দেশ দিয়া হৈছে ৷
আৰক্ষীয়ে লাভ কৰা নাই পলাতক কয়দীৰ সন্ধান
এই প্ৰতিবেদন প্ৰস্তুত কৰাৰ সময়লৈকে আৰক্ষীয়ে উলিয়াব পৰা নাই কোনো এটা পলাতক কয়দীৰ সন্ধান । ইপিনে, কাৰাগাৰৰ ভিতৰৰ পৰা একেলগে পাঁচটাকৈ অভিযুক্তই পলায়ন কৰাৰ পাছতেই মৰিগাঁও জিলা কাৰাগাৰৰ নিৰাপত্তাক লৈ প্ৰশ্ন উত্থাপন কৰে স্থানীয় বিধায়ক ৰমাকান্ত দেউৰীয়ে । আনহাতে, পলাতক পাঁচ কয়দীৰ বিৰুদ্ধে মৰিগাঁও আৰক্ষীয়ে আন এক গোচৰ ৰুজু কৰি অভিযান তীব্রতৰ কৰি তুলিছে ।
