গুৱাহাটী: অসম চৰকাৰে নিৰ্মাণ কৰি থকা দীঘলী পুখুৰী আৰু নুনমাটি সংযোগী উৰণ সেতুখনৰ নিৰ্মাণ বন্ধ কৰাৰ বাবে বিৰোধী দলপতি দেৱব্ৰত শইকীয়া গুৱাহাটী উচ্চ ন্যায়ালয়ৰ দ্বাৰস্থ হৈছে । মুখ্যতঃ গুৱাহাটীৰ পৰিৱেশৰ ওপৰত বিৰূপ প্ৰভাৱ পেলোৱা আৰু প্ৰদূষণৰ সৃষ্টি কৰাৰ অভিযোগ তুলি শকীয়াই উৰণ সেতুখনৰ নিৰ্মাণ কাৰ্যত গুৱাহাটী উচ্চ ন্যায়ালয়ৰ হস্তক্ষেপ বিচাৰি আজি এখন আৱেদন দাখিল কৰিছে ।
শইকীয়াই আৱেদনখনত উল্লেখ কৰা মতে চলিত বছৰৰ এক জানুৱাৰীত মুখ্যমন্ত্ৰী হিমন্ত বিশ্ব শৰ্মাই এই সেতুখনৰ নিৰ্মাণকাৰ্যৰ আধাৰশিলা স্থাপন কৰিছিল । ৫.৪৪ কিলোমিটাৰ দৈৰ্ঘ্যৰ উৰণ সেতুখন নিৰ্মাণত ৮৫২ কোটি টকা ধাৰ্য কৰা হৈছে ।
এই সেতুখন নিৰ্মাণৰ সময়ত সমগ্ৰ অঞ্চলটো প্ৰদূষিত হোৱাৰ লগতে কৃত্ৰিম বানৰ সমস্যা, যানজঁটৰ সমস্যাৰ লগতে পদপথৰ ব্যৱসায়ীসকলৰ সমস্যা জটিল হৈ পৰিব বুলি তেওঁ অভিযোগ কৰে । আৱেদনখনত শইকীয়া উল্লেখ কৰে যে গুৱাহাটী ভয়ংকৰ বায়ু প্ৰদূষণৰ কৱলত পৰিছে ।
এই উৰণ সেতু নিৰ্মাণে এই সমস্যা বৃদ্ধি কৰিব । তেওঁ আৱেদনখনত উল্লেখ কৰা মতে World Air Quality Report 2023 অনুসৰি গুৱাহাটীক দ্বিতীয় সৰ্বাধিক প্ৰদূষিত চহৰ হিচাপে স্থান দিয়া হৈছে ।
গুৱাহাটীত ২০২২ চনৰ পৰা ২০২৩ চনৰ ভিতৰত প্ৰতি ঘনমিটাৰত পি এম ২.৫ৰ ঘনত্ব ৫১ৰ পৰা ১০৫.৪ মাইক্ৰ’গ্ৰামলৈ দুগুণ বৃদ্ধি পোৱা দেখা গৈছে । শইকীয়াই আৱেদনখনত উল্লেখ কৰা মতে, এই উৰণ সেতুৰ নিৰ্মাণকাৰ্যই সংবিধানৰ 21 অনুচ্ছেদ (জীৱন নিৰ্বাহৰ অধিকাৰ ) আৰু অনুচ্ছেদ 48-A (পৰিৱশৰ সুৰক্ষা আৰু উন্নত কৰা ), Environmental Protection Act, 1986; the Air (Prevention and Control of Pollution) Act, 1981; the Noise Pollution (Regulation and Control) Rules, 2000; the Street Vendors Act, 2014 আদি ভংগ কৰিব । আৱেদনৰ জৰিয়তে বিৰোধী দলপতিগৰাকীয়ে এইক্ষেত্ৰত উচ্চ ন্যায়ালয়ৰ হস্তক্ষেপ বিচাৰি উৰণ সেতুখন নিৰ্মাণত হস্তক্ষেপ কৰাৰ লগতে কেতবোৰ পৰিৱেশ অনুকুল বিকল্প পদক্ষেপ লোৱাৰ বাবে চৰকাৰক নিৰ্দেশ দিয়াৰ বাবে আৱদনখন জনাইছে ।
লগতে পঢ়ক: মুখ্যমন্ত্রীয়ে কোৱাৰ দৰে কংগ্ৰেছ দল খিলঞ্জীয়া বিৰোধী নহয়: উদাহৰণসহ প্ৰত্যুত্তৰ বিৰোধী দলপতিৰ
