ধেমাজি, 21 জুলাই: ৰাজ্যৰ সৰ্বত্ৰে বৰ্তমানেও অব্যাহত বানৰ বিভীষিকা ৷ উজনিৰ পৰা নামনিলৈ আহাৰমহীয়া বানত ককবকাইছে সৰ্বসাধাৰণে ৷ জনাঞ্চল-বনাঞ্চল সকলোতে এতিয়া কেৱল পানী আৰু পানী ৷ বাঢ়নী পানীয়ে বুৰাই পেলাইছে ঘৰ-বাৰী, কৃষিভূমিৰ লগতে বিস্তীৰ্ণ অঞ্চল ৷ ইয়াৰ মাজতে ধেমাজি জিলাৰ বিভিন্ন অঞ্চলতো বানে লৈছে কাল ৰূপ ৷
এটুপি খোৱাপানী, শৌচাগাৰ-প্ৰস্ৰাৱগাৰ বিচাৰি হাহাকাৰ লাগিছে বন্যাৰ্তৰ মাজত । ধেমাজি ৰাজহ চক্ৰৰ অধীনৰ 2 নং বৰুৱা লালুঙত বন্যাৰ্তৰ দুখে কুলাই-পাচিয়ে নধৰা হৈছে ৷ লালুঙৰ ৰাই নদীৰ পানীয়ে বিচ্ছিন্ন কৰি পেলাইছে জলজীৱন আঁচনিৰ পাইপৰ সংযোগ ৷
জুলাই মাহত অহা ৰাই নদীৰ পানীয়ে গাওঁখনৰ পঞ্চাশৰো অধিক পৰিয়ালৰ ঘৰ-বাৰী পথাৰ নিমিষতে প্লাৱিত কৰি পেলাইছে ৷ মুহূৰ্ততে গাওঁখনৰ পকী ঘৰ, অৰ্ধ পকী ঘৰ আৰু কেঁচা ঘৰ সকলোতে পানী সোমাই ঘৰৰ ভিতৰত সৃষ্টি হৈছে অবৰ্ণনীয় পৰিৱেশৰ ৷ সমান্তৰালভাবে, বানত ডুব গৈছে শৌচাগাৰ-প্ৰস্ৰাৱগাৰ, কুঁৱা, ঘৰুৱা মটৰ সংযোগী পানীৰ পাইপ, জলজীৱন আঁচনিৰ ঘৰুৱা সংযোগী আৰু পথত সংযোগ হোৱা পানী পাইপ সকলো ৷
ইপিনে, চৰকাৰে কেৱল বান সাহায্যৰ নামত চাউল, দালি, নিমখ কিছু বিতৰণ কৰিয়েই দায়িত্ব সামৰিছে বুলি বন্যাৰ্তই ক্ষোভ প্ৰকাশ কৰিছে ৷ বন্যাৰ্তক সাহায্য আগবঢ়োৱাৰ ক্ষেত্ৰত ধেমাজি জিলা প্ৰশাসনে সম্পূৰ্ণ নিৰ্বিকাৰ ভূমিকা গ্ৰহণ কৰি আহিছে বুলিও সংবাদ মাধ্যমৰ আগত ক্ষোভ প্ৰকাশ কৰে বানাক্ৰান্তই ।
বানত বেয়াকৈ ক্ষতিগ্ৰস্ত হোৱা লালুং গাঁৱৰ ৰাইজৰ দুখ-দুৰ্দশাৰ প্ৰতি জনপ্ৰতিনিধি-মন্ত্ৰীয়ে প্ৰয়োজনীয় গুৰুত্ব নিদিয়াত তীব্ৰ ক্ষোভ প্ৰকাশ কৰিছে অঞ্চলটোৰ ৰাইজে ৷
