গুৱাহাটী,২৫ ছেপ্টেম্বৰ: গুৱাহাটীত ক্রমাৎ বৃদ্ধি পাইছে ডেংগুৰ আতংক । বিশেষকৈ মহানগৰীৰ জু-ৰোড অঞ্চলৰ ভাস্কৰ নগৰ অঞ্চলত যোৱা কিছুদিন ধৰি ব্যাপক হাৰত ডেংগু ৰোগত আক্রান্ত ৰোগীৰ সংখ্যা বৃদ্ধি পোৱাক কেন্দ্ৰ কৰি চাঞ্চল্যৰ সৃষ্টি হৈছে অঞ্চলটোত । সম্প্ৰতি গুৱাহাটী মেডিকেল কলেজ হাস্পতালত ডেংগুত আক্ৰান্ত ১১ গৰাকী লোক চিকিৎসাধীন হৈ আছে ৷ এই কথা জি এম চি এইচৰ অধীক্ষক অভিজিত শৰ্মাই জনায় ।
তেওঁ সংবাদ মাধ্যমৰ আগত কয়,"বিগত বৰ্ষত ডেংগুত আক্ৰান্ত ১৭০ গৰাকী ৰোগী চিকিৎসাধীন হৈছিল । এইবাৰ ৫৭ গৰাকী ডেংগুত আক্ৰান্ত ৰোগী চিকিৎসাধীন হৈছিল । তাৰ ভিতৰত ৩ গৰাকীৰ মৃত্যু হোৱাৰ লগতে বৰ্তমান ১১ গৰাকী লোক চিকিৎসাধীন হৈ আছে । ডেংগুৰ প্ৰাথমিক লক্ষণ ডিঙিৰ বিষ, ভালকৈ কথা কব নোৱৰা, অতিমাত্ৰা জ্বৰ ইত্যাদি হ'লে চিকিৎসকৰ পৰামৰ্শ লোৱাটো জৰুৰী ।"
উল্লেখ্য যে ছেপ্টেম্বৰ মাহৰ প্ৰথম ভাগৰে পৰা জু-ৰোডৰ ভাস্কৰ নগৰ, অৰুণাচল পথ, চাহেব টিলা, কার্বি পথ আদি অঞ্চলত বৃদ্ধি পাইছে ডেংগুত আক্রান্ত ৰোগীৰ সংখ্যা । স্থানীয় লোকে জনোৱা অনুসৰি এই অঞ্চলৰ প্রায় ১০০ টাৰো অধিক পৰিয়ালৰ লোক ডেংগুত আক্রান্ত হৈছে । ইয়াৰে কিছুসংখ্যক লোক জু-ৰোডৰ কে জি এম টি হাস্পতালত আৰু গুৱাহাটী চিকিৎসা মহাবিদ্যালয় হাস্পতালত চিকিৎসাধীন হৈ আছে ।
আনহাতে, একাংশ লোকে চিকিৎসকৰ পৰামৰ্শ লৈ ঘৰতে চিকিৎসা কৰি আছে । স্থানীয় লোকৰ ভাষ্য অনুসৰি অঞ্চলটোৰ মাজেৰে যোৱা ৰে'লৱেৰ কদর্য নলা আৰু ৰেলৱেৰ ডাম্পিং গ্রাউণ্ডৰ বাবে ভাস্কৰ নগৰ অঞ্চলত ডেংগু ৰোগীৰ সংখ্যা বাঢ়িছে । অঞ্চলটোত চৰকাৰ তথা বিভাগীয় কর্তৃপক্ষই বর্তমানলৈ ফগিং বা নলাৰ জাবৰ নিষ্কাশন নকৰাৰ ফলতে মহৰ সংখ্যা যথেষ্ট বৃদ্ধি পাইছে ।
