গুৱাহাটী, ১৬ জুলাই : ক্ৰমাৎ ৰাজ্যৰ সামগ্ৰিক বান পৰিস্থিতি উন্নত হৈছে । ৰাজ্যৰ প্ৰায়বোৰ জিলাতে বানৰ প্ৰকোপ কমিবলৈ ধৰিছে ৷ ইয়াৰ মাজতে ধুবুৰী আৰু নগাঁও জিলাত যোৱা ২৪ ঘণ্টাত তিনিজন লোকে বানত প্ৰাণ হেৰুৱাইছে । এই তিনিজনকে ধৰি বৰ্তমান পর্যন্ত বানত মৃত্যু হোৱা লোকৰ সংখ্যাই ৯৬ ৰ ঘৰ স্পৰ্শ কৰিছে ।
অৱশ্যে ব্ৰহ্মপুত্ৰৰ জলস্তৰ নিমাতীঘাট, তেজপুৰ, ধুবুৰীত, বুঢ়ীদিহিং-খোৱাঙ, দিচাং নঙলামূৰাঘাটত এতিয়াও বিপদ সীমাৰ ওপৰেৰে বৈ আছে । উল্লেখ্য যে, ব্ৰহ্মপুত্ৰৰ লগতে ইয়াৰ উপনৈসমূহৰ পানী ক্ৰমান্বয়ে কমিবলৈ আৰম্ভ কৰাত যোৱা ২৪ ঘণ্টাত ৰাজ্যখনত বানাক্ৰান্ত জিলাৰ সংখ্যা ১৮ খনৰ পৰা ১৭ খনলৈ হ্ৰাস পাইছে ।
লগতে পঢ়ক : পথাৰত গেলিছে ফচল, পাচলিৰ খেতিপথাৰলৈ চাই কৃষকৰ হুমুনিয়াহ - Assam Flood 2024
বানৰ প্ৰকোপ কমিলেও ৰাজ্যৰ বিভিন্ন জিলাত বানাক্ৰান্ত লোকৰ দুখ-দুৰ্দশাৰ অন্ত পৰা নাই । এতিয়াও বন্যাৰ্তসকল বহু সমস্যাৰ সন্মুখীন হৈ আছে । বহুলোক এতিয়াও আশ্ৰয় শিবিৰতে আছে । শেহতীয়াকৈ ১১৬ টা আশ্ৰয় শিবিৰত আশ্ৰয় লৈ আছে বহু বানাক্ৰান্তই ।
অসম ৰাজ্যিক দুৰ্যোগ ব্যৱস্থাপনা কর্তৃপক্ষই প্ৰকাশ কৰা শেহতীয়া তথ্য মতে, ৰাজ্যৰ ১৭ খন জিলাৰ ৪৯ টা ৰাজহ চক্ৰৰ ১১৩২ খন গাঁৱৰ ৫.১২ লাখ লোক বানৰ কবলত আছে । দেওবাৰৰ তুলনাত আক্ৰান্তৰ সংখ্যা কিছু হ্ৰাস পাইছে । এতিয়াও প্ৰায় ২৩ হেজাৰ লোক বিভিন্ন আশ্ৰয় শিবিৰত আছে । বহু বানাক্ৰান্তই আশ্ৰয় শিবিৰৰ পৰা নিজৰ ঘৰলৈ ঘূৰি যোৱাৰ ক্ষেত্ৰত বিভিন্ন সমস্যাৰ সন্মুখীন হৈছে ।
ইপিনে গুৱাহাটীৰ বৰঝাৰত থকা বতৰ বিজ্ঞান কেন্দ্ৰই সদৰী কৰা তথ্য মতে, অহা ১৭ জুলাইকৈ ৰাজ্যত অধিকাংশ ঠাইতে পাতলীয়াৰ পৰা মজলীয়া বৰষুণ হোৱাৰ সম্ভাৱনা আছে । লগতে একাংশ জিলাত প্ৰবল বৰষুণ হোৱাৰ কথাও গুৱাহাটীৰ বৰঝাৰত থকা বতৰ বিজ্ঞান কেন্দ্ৰই সদৰী কৰিছে । এই সময়ছোৱাত ৰাজ্যৰ একাংশ জিলাত ৭ মিলিমিটাৰ পৰা ১০ মিলিমিটাৰত বৰষুণ হোৱাৰ সম্ভাৱনা গুৱাহাটীৰ বৰঝাৰত থকা বতৰ বিজ্ঞান কেন্দ্ৰই সদৰী কৰিছে ৷
লগতে পঢ়ক : জলসম্পদ মন্ত্ৰীৰ পদত্যাগ দাবী চিপিআই এম নেতা সুপ্ৰকাশ তালুকদাৰৰ - Assam Flood 2024
আনহাতে, অসমৰ বান পৰিস্থিতিৰ বুজ ল'বলৈ সোমবাৰে কেন্দ্ৰীয় গৃহমন্ত্ৰী অমিত শ্বাহে মুখ্যমন্ত্ৰী ড৹ হিমন্ত বিশ্ব শৰ্মাৰ সৈতে টেলিফোনযোগে বাৰ্তালাপ কৰে । অসমৰ বান পৰিস্থিতিৰ সৈতে মোকাবিলা কৰাত ৰাজ্যখনক সহায় কৰিবলৈ কেন্দ্ৰীয় চৰকাৰৰ পৰা সম্ভৱপৰ সকলো সহায়-সহযোগিতা কৰাৰ কথা কেন্দ্ৰীয় গৃহমন্ত্ৰীগৰাকীয়ে সদৰী কৰে ।
মুখ্যমন্ত্ৰী হিমন্ত বিশ্ব শৰ্মাই X ৰ এটা পোষ্টত কয়, ‘‘কেন্দ্ৰীয় গৃহমন্ত্ৰী অমিত শ্বাহে ৰাজ্যৰ বান পৰিস্থিতিৰ বুজ ল'বলৈ আজি পুৱা মোক টেলিফোন কৰে । অসমৰ বানৰ বিষয়ে তেওঁক এটি বিৱৰণ দাঙি ধৰো ৷ অসমৰ বান পৰিস্থিতিৰ সৈতে মোকাবিলা কৰাত ৰাজ্যখনক সহায় কৰিবলৈ কেন্দ্ৰীয় চৰকাৰৰ পৰা সম্ভৱপৰ সকলো সহায়-সহযোগিতা কৰাৰ কথা তেওঁ পুনৰ ব্যক্ত কৰিছে ।"
লগতে পঢ়ক : এতিয়াও পানীৰ তলত ৰাজ্যৰ ১৮ খন জিলা; মৃতকৰ সংখ্যা ৯৩ লৈ বৃদ্ধি - Assam Flood 2024
