ডিব্ৰুগড়,৩০ জুলাই: ৰাজ্যখনৰ ভিতৰতে ভয়াবহ বানৰ কৱলত পৰিছিল এইবাৰ ডিব্ৰুগড় জিলাখন । বিশেষকৈ নৱগঠিত খোৱাং বিধানসভা সমষ্টিটো কেইবা ঠাইতো মথাউৰি আৰু ৰিং বান্ধ ছিগি যোৱাত বহু গাঁও বানৰ কৱলত পৰিছিল । আজিও বহু অঞ্চলত ৰাইজে মথাউৰিতে আশ্ৰয় গ্ৰহণ কৰি থাকিব লগা হৈছে । চৰকাৰে বানাক্ৰান্ত ৰাইজক পৰ্যাপ্ত বান সাহাৰ্য প্ৰদান কৰিবলৈ সক্ষম নহ'লেও বিভিন্ন অনুষ্ঠান-প্ৰতিষ্ঠানে বানাক্ৰান্ত ৰাইজক প্ৰদান কৰিছে বান সাহাৰ্য ।
ইয়াৰ মাজতে মঙলবাৰে ডিব্ৰুগড়ত আৰ্তজনৰ কাষত উপস্থিত হয় জনপ্ৰিয় শিল্পী মহেন্দ্ৰ হাজৰিকা । ডিব্ৰুগড়ৰ দিহিং থান গাঁৱত বান-খহনীয়াই সংহাৰী ৰূপ গ্ৰহণ কৰাত অঞ্চলবাসীয়ে হাঁহাকাৰ কৰিবলগীয়া হৈছে । শিল্পীগৰাকীয়ে ৰাইজৰ দুখ-দুৰ্দশাৰ সমভাগী হোৱাৰ লগতে চৰকাৰৰ ভূমিকাক কটু সমালোচনা কৰে । মঙলবাৰে অসম ভীম সেনাই নৈ-পৰীয়া খোৱাং বিধানসভা সমষ্টিৰ দিহিং থান গাঁৱত আয়োজন কৰা বান সাহাৰ্য বিতৰণ অনুষ্ঠানত উপস্থিত থাকি মহেন্দ্ৰ হাজৰিকাই বানাক্ৰান্তৰ অনুৰোধত গীতো পৰিৱেশন কৰি বানাক্ৰান্ত ৰাইজৰ সৈতে সময়ত অতিবাহিত কৰে ।
অসম ভীম সেনাই অঞ্চলটোত বান শিবিৰ অনুষ্ঠিত কৰি প্ৰায় দুই শতাধিক বানাক্ৰান্ত পৰিয়াললৈ চাউল, দাইলকে ধৰি বিভিন্ন খাদ্য সামগ্ৰী আৰু বস্ত্ৰ বিতৰণ কৰে । অনুষ্ঠানত অংশগ্ৰহণ কৰি বানাক্ৰান্ত ৰাইজৰ মাজৰ পৰাই শিল্পী মহেন্দ্ৰ হাজৰিকাই কয়,"চৰকাৰৰ জনপ্ৰতিনিধিয়ে নিৰ্বাচনৰ সময়ত অহাৰ দৰে দুৰ্যোগৰ সময়তো ৰাইজৰ কাষত থকাটো প্ৰয়োজন । নিৰ্বাচনৰ সময়ত যিদৰে ৰাইজৰ ওচৰত সকলো থাকে বিপদৰ সময়তো থাকিব লাগে । সাধাৰণ খাটি খোৱা মানুহৰ দুখ দুৰ্দশাৰ বুজ লোৱাটো জনপ্ৰতিনিধিসকলৰ প্ৰধান কৰ্তব্য ।"
