ডিব্ৰুগড়,৯ জুলাই: ৰাজ্যখনৰ ভিতৰত ডিব্ৰুগড় জিলাৰ খোৱাঙত এইবাৰ বানৰ ভয়াবহতা অধিক হৈ পৰিছে । বান পৰিস্থিতি কিছু নিয়ন্ত্ৰণলৈ আহিছে যদিও ৰাইজৰ মাজত হাহাকাৰ পৰিৱেশৰ সৃষ্টি হৈছে । আনহাতে ডিব্ৰুগড়ৰ খোৱাং সমষ্টিত এইবাৰ বানে কেইবাটাও মথাউৰি ছিগাত অধিক ভয়াবহতাই দেখা দিছিল । বান পৰিস্থিতিৰ বুজ ল'বলৈ মুখ্যমন্ত্ৰীৰ পৰা আৰম্ভ কৰি জলসম্পদ মন্ত্ৰী উপস্থিত হৈছিল খোৱাঙত ।
কেইটামান দিনৰ পুৰ্বে ডিব্ৰুগড়ৰ খোৱাঙত জলসম্পদ মন্ত্ৰী পীযুষ হাজৰীকাই ছিগা মথাউৰিকেইটা কংগ্ৰেছৰ দিনতে বনোৱা বুলি মন্তব্য কৰা পিচতে কংগ্ৰেছৰ প্ৰাক্তন মন্ত্ৰী এতোৱা মুণ্ডাই মঙলবাৰে উভতি ধৰিলে জলসম্পদ মন্ত্ৰীগৰাকীক । মুণ্ডাই খোৱাঙত উপস্থিত হৈ কয়, "কংগ্ৰেছে মথাউৰিকেইটা নবনোৱা হ'লে আজি আৰু ভয়ানক বান পৰিস্থিতি হ'লহেঁতেন । বিজেপিয়ে আজিলৈকে এটাও মথাউৰি বনোৱা নাই । কংগ্ৰেছে বনোৱা মথাউৰিকেইটা মেৰামতি কৰিবলৈকে বিজেপিৰ দম নাই ।" বিজেপিয়ে আমাক ধন্যবাদহে দিব লাগে বুলি প্ৰাক্তন মন্ত্ৰীজনে মন্তব্য কৰে ।
আনহাতে মঙলবাৰে খোৱাঙৰ বানাক্ৰান্ত ৰাইজৰ খবৰ লয় AICC ৰ সাধাৰণ সম্পাদক তথা অসম কংগ্ৰেছৰ তত্ত্বাৱধায়ক বিকাশ উপাধ্যায়ে । টুলুঙা নাৱত উঠি খোৱাঙৰ বানাক্ৰান্তৰ দুখ-দুৰ্দশাৰ বুজ লয় নেতাগৰাকীয়ে । নেতাজনে সাংবাদিকৰ আগত বিজেপি চৰকাৰখনৰ কামকাজক ক্ষুৰধাৰ সমালোচনা কৰে । নেতাজনৰ সৈতে বন্যাৰ্তৰ খবৰ লৈ খোৱাং ব্লক কংগ্ৰেছ কমিটিৰ সভাপতি বিজু দুৱৰাই পশু খাদ্যৰ নামত চৰকাৰে ম্যাদ উকলা খাদ্য যোগান ধৰি পশুধনৰ বেমাৰ সৃষ্টি কৰিছে বুলি অভিযোগ কৰে ।
মঙলবাৰে কংগ্ৰেছৰ দলটোৱে বানাক্ৰান্তৰ কেইবাটাও শিবিৰত বান সাহাৰ্য বিতৰণ কৰে । দলটোত প্ৰাক্তন বিধায়িকা জীৱনতাৰা ঘাটোৱাৰ, প্ৰাক্তন মন্ত্ৰী এতোৱা মুণ্ডাৰ লগতে কংগ্ৰেছৰ কেইবাজনো নেতা উপস্থিত থাকে ।
