গুৱাহাটী,৭ মাৰ্চ: জাতীয় বীৰ লাচিত বৰফুকনৰ সৰ্বোচ্চ প্রতিমূর্তি উন্মোচন উপলক্ষে সদৌ টাই আহোম ছাত্ৰ সন্থা আৰু টাই আহোম যুৱ পৰিষদে কৰা অনুৰোধৰ প্ৰতি সন্মান জনাই অহা ৯ মাৰ্চত সদৌ অসম ছাত্র সন্থা আৰু ৩০ জনগোষ্ঠীয় সংগঠনে আহ্বান জনোৱা CAA বিৰোধী প্রতিবাদী কাৰ্যসূচী ১০ মাৰ্চত ৰূপায়ণ কৰা হ'ব ।
১০ মাৰ্চত পুৱা ছয় বজাৰপৰা সন্ধিয়া ছয় বজালৈ প্ৰতিখন জিলা সদৰত ১২ ঘণ্টীয়া অনশন কাৰ্যসূচী ৰূপায়ন কৰা হ'ব বুলি আছুৰ সভাপতি উৎপল শৰ্মা, সাধাৰণ সম্পাদক শংকৰজ্যোতি বৰুৱাই এক বিবৃতিযোগে সদৰি কৰে । উল্লেখ্য যে CAA ৰ বিৰুদ্ধে এই জাতীয় জনগোষ্ঠীয় সংগঠনকেইটাই অহা ৮ মাৰ্চৰ পৰা ধাৰাবাহিকভাৱে ৰাজ্যজুৰি আন্দোলন গঢ়ি তুলিবলৈ সিদ্ধান্ত গ্ৰহণ কৰিছে । যোৱা ২৯ ফেব্ৰুৱাৰীত গুৱাহাটীত অনুষ্ঠিত এখন সভাত এই সিদ্ধান্ত গ্ৰহণ কৰা হৈছিল ।
উল্লেখযোগ্য যে ছাত্ৰ সন্থা আৰু ৩০ জনগোষ্ঠীয় সংগঠনৰ নেতৃত্বৰ এখন জৰুৰী সভা গুৱাহাটীত অনুষ্ঠিত হৈছিল । এই সভাৰ অন্তত আয়োজিত সংবাদমেলত ছাত্ৰ সন্থাৰ সভাপতি উৎপল শৰ্মা, সাধাৰণ সম্পাদক শংকৰজ্যোতি বৰুৱা, মুখ্য উপদেষ্টা ড৹ সমুজ্জ্বল কুমাৰ ভট্টাচার্যসহ ৩০ জনগোষ্ঠীয় সংগঠনৰ নেতৃত্বই স্পষ্ট ভাষাৰে কৈছিল যে পূৰ্বোত্তৰৰ জনসাধাৰণে CAA মানি লোৱা নাই আৰু কাহানিও মানি নলয় । ইয়াৰ বিৰুদ্ধে ছাত্ৰ সন্থাসহ পূৰ্বোত্তৰৰ বিভিন্ন সংগঠন ন্যায়ালয়ৰ কাষ চাপিছে ।
৯ মাৰ্চত লাচিত বৰফুকনৰ প্ৰতিমূৰ্তি উন্মোচনৰ প্ৰতি শ্ৰদ্ধা জনায়ো CAA আইন জাপি দি সংগঠনকেইটাই অঞ্চলটোৰ খিলঞ্জীয়া জনসাধাৰণৰ প্ৰতি কৰা চূড়ান্ত অন্যায়-অবিচাৰৰ প্ৰতিবাদত প্ৰতিখন জিলাৰ সদৰ স্থানত পুৱা ৬ বজাৰপৰা সন্ধিয়া ৬ বজালৈ ১২ ঘণ্টীয়া অনশন ধর্মঘট কাৰ্যসূচী ৰূপায়ণ কৰিব বুলি তেওঁলোকে সদৰি কৰিছিল । কিন্তু এতিয়া আকৌ পিছত এই ক্ষেত্ৰত সংগঠনকেইটাই সিদ্ধান্ত সলনি কৰা পৰিলক্ষিত হয় ।
উল্লেখ্য যে ৮ মাৰ্চত অসম ভ্ৰমণলৈ আহিব প্ৰধানমন্ত্ৰী নৰেন্দ্ৰ মোডী । অহা ৮ মাৰ্চৰ নিশা প্ৰধানমন্ত্ৰীয়ে কাজিৰঙাত নিশা কটাব । পিছদিনা কাজিৰঙা ৰাষ্ট্ৰীয় উদ্যান পৰিদৰ্শন কৰিব । প্ৰধানমন্ত্ৰী মোডীয়ে ৯ মাৰ্চত যোৰহাটৰ হোলাঙাপাৰস্থিত লাচিত মৈদামত অসম চৰকাৰৰ দ্বাৰা নিৰ্মিত লাচিত বৰফুকন স্মাৰক আৰু সাংস্কৃতিক প্ৰকল্পৰ সৰ্ববৃহৎ বীৰ লাচিতৰ প্ৰতিমূৰ্তি উন্মোচন কৰিব । তাৰ পিছত দিনৰ ২ বজাত যোৰহাটত এখন জনসভা সম্বোধন কৰিব দেশৰ প্ৰধানমন্ত্ৰীগৰাকীয়ে ।
লগতে পঢ়ক: কা আহিলে ভোট নিদিব, ময়ো নিদিও : জুবিন গাৰ্গ
