স্প’ৰ্টছ ডেস্ক, 14 ছেপ্টেম্বৰ: ভাৰতীয় ক্ৰিকেট দলৰ অন্যতম সদস্য আৰু চেন্নাই চুপাৰ কিংছৰ(চি এছ কে) বেটছমেন সুব্ৰমণিয়াম বদ্ৰীনাথে এম এছ ধোনীৰ সন্দৰ্ভত শ্বেয়াৰ কৰিছে কিছু তথ্য ৷ সততে শান্ত প্ৰকৃতি তথা বন্ধুত্বসুলভ আচৰণৰ বাবে জনাজাত ভাৰতৰ প্ৰাক্তন অধিনায়ক মহেন্দ্ৰ সিং ধোনীৰো আছে খং ৷ "কেপ্টেইন কুল" খ্যাত ধোনীৰ সন্দৰ্ভত এই কথা প্ৰকাশ কৰে এছ বদ্ৰীনাথে ৷
প্ৰায় ছয়টাকৈ ছিজনৰ বাবে ইণ্ডিয়ান প্ৰিমিয়াৰ লীগত(আই পি এল) ধোনীৰ সৈতে একেটা ড্ৰেছিং ৰুম শ্বেয়াৰ কৰা বদ্ৰীনাথে ধোনীৰ সন্দৰ্ভত প্ৰকাশ কৰা এই মন্তব্যই আলোড়ন সৃষ্টি কৰিছে অনুৰাগীৰ মনত ৷ সকলোৱে জানিব বিচাৰিছে ই কেনেদৰে সম্ভৱ ৷ কিয়নো অনুৰাগীসকলে কেতিয়াও দেখা নাই ধোনীৰ এই ৰূপ ৷
এই সন্দৰ্ভত তাৰকা ক্ৰিকেটাৰ বদ্ৰীনাথে আই পি এলৰ এটা মুহূৰ্তৰ কথা ৰাজহুৱা কৰে ৷ আই পি এলৰ এখন ল’ স্কৰিং মেচত ৰয়েল চেলেঞ্জাৰ্ছ বেংগালুৰুৰ (আৰ চি বি) বিৰুদ্ধে পৰাজয়বৰণ কৰিছিল চেন্নাই চুপাৰ কিংছে ৷ এই পৰাজয়ৰ পিছত দলটোৰ অধিনায়কৰ দায়িত্বত থকা ধোনীয়ে স্পষ্টভাৱে প্ৰকাশ কৰিছিল তেওঁৰ খং ৷ ধোনীয়ে ড্ৰেছিং ৰুমত থকা এটা পানীৰ বটলত ভৰিৰে আঘাত কৰি দলিয়াই নিজৰ খং প্ৰকাশ কৰিছিল ৷ ইয়াৰ লগে লগে প্ৰকাশ পাইছিল খেলৰ সৈতে থকা ক্ৰিকেটাৰগৰাকীৰ একাত্মবোধৰ কথা ৷
"চেন্নাইত আৰ চি বি-ৰ বিৰুদ্ধে অনুষ্ঠিত এখন মেচত আমি 110 ৰাণৰ সহজ লক্ষ্য অনুসৰণ কৰি খৰখেদাকৈ হেৰুৱাইছিলো উইকেট ৷ যাৰ বাবে আমি মেচখন হেৰুৱাইছিলো । সেই দিনটোত আমি ৰয়েল চেলেঞ্জাৰ্ছ বেংগালুৰুৰ বিৰুদ্ধে বৰ বেয়াকৈ হাৰিছিলো" বুলি বদ্ৰীনাথে সদৰী কৰিছিল ।
"মই অনিল কুম্বলেৰ বলত এল বি ডব্লিউ হৈ পেভিলিয়নলৈ উভতিছিলো ৷ সেই সময়তে ধোনী ড্ৰেছিং ৰুমৰ ভিতৰলৈ আহি আছিল আৰু মই তাত থিয় হৈ আছিলো ৷ মোৰ সন্মুখত এটা সৰু পানীৰ বটল আছিল আৰু এম এছে সেইটো লঠিয়াই ৰুমৰ পৰা বাহিৰলৈ উলিয়াই দিছিল ৷ ড্ৰেছিং ৰুমত থকা আমি কোনেও সেই সময়ত তেওঁৰ চকুত চকু থ’ব পৰা নাছিলো" বুলি বদ্ৰীনাথে লগতে কয় ।
উল্লেখ্য যে, ধোনী নেতৃত্বাধীন চি এছ কে-ক আই পি এলৰ অন্যতম শক্তিশালী দল হিচাপে গণ্য কৰা হয় ৷ দলটোৱে প্ৰাক্তন ভাৰতীয় ক্ৰিকেটাৰগৰাকীৰ নেতৃত্বত পাঁচটাকৈ আই পি এলৰ খিতাপ জয় কৰিছিল ।
