গুৱাহাটী, ২১ মাৰ্চ: ‘‘বিজেপি চৰকাৰে ক’ভিডৰ ভেকচিন দি সকলো মানুহক দুৰ্বল কৰিলে ৷ এইখন চৰকাৰে টকাৰ স্বাৰ্থত শাৰীৰিক আৰু মানসিকভাৱে প্ৰতিগৰাকী ভাৰতীয়ক দুৰ্বল কৰিলে ৷’’ এই গুৰুতৰ অভিযোগ গুৱাহাটী লোকসভা সমষ্টিৰ কংগ্ৰেছৰ প্ৰাৰ্থী মীৰা বৰঠাকুৰৰ ৷
লোকসভা নিৰ্বাচনৰ দিন চমু চাপি অহাৰ লগে লগে বিভিন্ন ৰাজনৈতিক দলৰ মাজত তৎপৰতা বৃদ্ধি হৈছে । বিভিন্ন দলৰ পৰা প্ৰক্ষেপ কৰা প্ৰাৰ্থীসকলৰ আহৰি নোহোৱা হৈছে । এইক্ষেত্ৰত গুৱাহাটী লোকসভা সমষ্টিত বিজেপি আৰু কংগ্ৰেছৰ প্ৰাৰ্থীৰ মাজত নিৰ্বাচনী প্ৰচাৰ তীব্ৰতৰ হৈছে ।
উল্লেখ্য যে এইবাৰ গুৱাহাটী লোকসভা সমষ্টিৰ পৰা কংগ্ৰেছৰ পৰা মীৰা বৰঠাকুৰক আৰু বিজেপিৰ পৰা বিজুলী কলিতা মেধিক প্ৰাৰ্থিত্ব প্ৰদান কৰা হৈছে । গুৱাহাটী লোকসভা সমষ্টিত এইবাৰ এই দুয়োগৰাকীৰ মাজতে মূলতঃ নিৰ্বাচনী যুঁজ হ'ব বুলি সমীক্ষকসকলে সদৰী কৰিছে ।
একপ্ৰকাৰে ক’বলৈ গ'লে গুৱাহাটী লোকসভা সমষ্টিত কংগ্ৰেছ আৰু বিজেপি দুয়োটা দলৰে সাংগঠনিক ভেটি শক্তিশালী । ই টিভি ভাৰতৰে হোৱা আছুতীয়া সাক্ষাৎকাৰত গুৱাহাটী লোকসভা সমষ্টিৰ কংগ্ৰেছৰ প্ৰাৰ্থী মীৰা বৰঠাকুৰে নিজেও বিজেপি প্ৰাৰ্থীগৰাকীৰ সৈতে নিৰ্বাচনী যুঁজ হ’ব বুলি মন্তব্য কৰিছে ।
মীৰা বৰঠাকুৰে কয় যে তেওঁ মহিলাসকলৰ প্ৰধান সমস্যাসূহ তুলি ধৰিব । তেওঁ কয়, ‘‘মই যদি সাংসদ হিচাপে নিৰ্বাচিত হওঁ, গুৱাহাটীত বিভিন্ন ঠাইৰ পৰা গুৱাহাটীত কৰ্মৰত হোৱা মহিলাসকলৰ বাবে মহিলা হোষ্টেলৰ ব্যৱস্থা কৰিম । গুৱাহাটীত মহিলাৰ টয়লেটৰ সমস্যা সমাধান কৰিম । গুৱাহাটীৰ পদপথৰ শাকপাচলি বজাৰৰ পৰিৱৰ্তে ঠায়ে ঠায়ে এখন এখন ভাল শাক-পাচলিৰ বজাৰৰ ব্যৱস্থা কৰি দিয়াৰ ব্যৱস্থা কৰিম ।’’
মীৰা বৰঠাকুৰৰ মতে, গুৱাহাটীৰ দীৰ্ঘদিনীয়া খোৱাপানীৰ সমস্যা আৰু জাবৰ নিষ্কাষণৰ সমস্যা সমাধান কৰাৰ চেষ্টা কৰিব তেওঁ । কংগ্ৰেছৰ প্ৰাৰ্থীগৰাকীয়ে কয়, ‘‘খোৱাপানীৰ সমস্যা কেৱল গুৱাহাটী মহানগৰীতে নহয়, গুৱাহাটী লোকসভা সমষ্টিৰ অন্তৰ্গত বিভিন্ন ঠাইত খোৱাপানীৰ সমস্যা আছে । ডিমৰীয়া অঞ্চলত আজিও মানুহে ফলা বাঁহ বান্ধি নিজৰাৰ পানী বহুত কষ্ট কৰি সংগ্ৰহ কৰি আছে । বহুত ঠাইত বাঁহৰ দলঙেৰে মানুহে যাতায়ত কৰি আছে ।’’ তদুপৰি মীৰা বৰঠাকুৰে কয় যে তেওঁ যদি সাংসদ হয়, তেনেহ’লে দুধনৈত এটা ফুড প্ৰচেছিঙৰ উদ্যোগ স্থাপন কৰিব ।
কংগ্ৰেছৰ প্ৰাৰ্থী মীৰা ঠাকুৰৰ বিশ্বাস যে তেওঁ বিপুল ভোটত জয়লাভ কৰিব । ইতিমধ্যে ৰাইজৰ পৰা বিপুল সঁহাৰি লাভ কৰা বুলি তেওঁ মন্তব্য কৰে । তেওঁ কয় যে বিৰোধী দল অজাপ, ৰাইজৰ দলৰ উপৰিও বাওঁপন্থী দলসমূহেও তেওঁক সহায় কৰাৰ বাবে আগবাঢ়ি আহিছে ।
লগতে পঢ়ক: মুখ্যমন্ত্ৰীৰ পৰিয়ালৰ ভূমি কেলেংকাৰী হ’ব বিৰোধীৰ প্ৰধান ইছ্যু
