প্ৰতি বছৰে বৃদ্ধি পাইছে টাইপ ১ ডায়েবেটিছত আক্ৰান্ত ৰোগীৰ সংখ্যা । সোণম কাপুৰ, ফাৱাদ খান, নিক জোনাছ, সামান্থা ৰুথ প্ৰভু, পুলকিত সম্ৰাট, সুধা চন্দ্ৰন আদিৰ দৰে ডাঙৰ ডাঙৰ চেলিব্ৰিটিও টাইপ ১ ডায়েবেটিছৰ সৈতে যুঁজি আছে । সেয়ে প্ৰখ্যাত অন্তঃস্ৰাৱ বিশেষজ্ঞ ডাঃ বিপিন ছেঠীয়ে শিশুৰ টাইপ-১ ডায়েবেটিছ বৃদ্ধিৰ চিন্তনীয় ধাৰাটোৰ ওপৰত আলোকপাত কৰিছে, যাৰ বাবে সমগ্ৰ ভাৰতবৰ্ষতে ৮ লাখৰো অধিক লোক এই ৰোগত আক্ৰান্ত হৈছে বুলি তেওঁ জানিবলৈ দিয়ে । ডাঃ বিপিন ছেঠীয়ে কয় যে, টাইপ ১ ডায়েবেটিছৰ ৰোগীৰ বৃদ্ধি টাইপ ২ ডায়েবেটিছৰ বৃদ্ধিৰ হাৰতকৈ ২.৩% বেছি ।
ক্ৰমাৎ বৃদ্ধি হৈছে উদ্বেগ
গ্ল’বেল টাইপ ১ ডায়েবেটিছ ইনডেক্স অনুসৰি ভাৰতত টাইপ ১ ডায়েবেটিছ গড়ে ৬.৭ শতাংশ হাৰত বৃদ্ধি পাইছে, আনহাতে টাইপ ২ ডায়েবেটিছ ৪.৪ শতাংশ বৃদ্ধি পাইছে । এই ধাৰা আন্তঃৰাষ্ট্ৰীয় পৰ্যায়তো দেখা গৈছে, ব্ৰিটেইনত বছৰত আক্ৰান্ত পৰিসংখ্যা ৩.৫% আৰু আমেৰিকাত ২.৯% ।
এই ক্ৰমবৰ্ধমান উদ্বেগৰ প্ৰতি সঁহাৰি জনাই ৰিচাৰ্চ ছ’চাইটি ফৰ দ্য ষ্টাডি অৱ ডায়েবেটিছ– আৰ এছ এছ ডি আই আৰু ছান’ফি ইণ্ডিয়া লিমিটেড– এছ আই এলে হাত মিলাই টাইপ ১ ডায়েবেটিছত আক্ৰান্ত শিশুসকলৰ চিকিৎসা পদ্ধতি আৰু সমৰ্থনক প্ৰামাণিক কৰি তুলিছে । আৰ এছ এছ ডি আই – এছ আই এলৰ পদক্ষেপৰ অংশ হিচাপে সমগ্ৰ দেশৰ ১৪০০ ৰোগীক বিনামূলীয়াকৈ ইনচুলিন, চিৰিঞ্জ আৰু অন্যান্য প্ৰয়োজনীয় সামগ্ৰী যোগান ধৰা হৈছে, য’ত তেলেংগানাৰ ৭২ জন ৰোগী আছে ।
ভুল ধাৰণা আৰু সজাগতা
ডাঃ ছেঠীয়ে কয় যে, টাইপ ১ ডায়েবেটিছ, যিটো অটোইম্যুন ডিছঅৰ্ডাৰ যিয়ে মূলতঃ শিশুক আক্ৰান্ত কৰে ইয়াক সঠিক যত্নৰ দ্বাৰা ফলপ্ৰসূভাৱে পৰিচালনা কৰিব পাৰি । অৱশ্যে তেওঁ কয় যে, সজাগতাৰ অভাৱে প্ৰায়ে ৰোগ নিৰ্ণয় কৰাত পলম হয় । ওজন কমি যোৱা, ভোক, পেটৰ বিষ, অত্যধিক পিয়াহ আৰু বমি আদি লক্ষণ দেখা দিলে চিকিৎসকৰ পৰামৰ্শ লোৱা উচিত ।
স্বাভাৱিক জীৱন যাপন কৰিব পাৰে!
সময়মতে ইনচুলিন চিকিৎসা আৰু খাদ্যাভ্যাসৰ সৰু সৰু সালসলনি কৰিলে আক্ৰান্ত শিশুৱে স্বাভাৱিক জীৱন যাপন কৰিব পাৰে । বিশেষকৈ গ্ৰামাঞ্চল আৰু অৰ্ধনগৰ অঞ্চলত সজাগতা বৃদ্ধিৰ লগতে ইনচুলিন আৰু ডায়েবেটিছ ব্যৱস্থাপনাৰ খৰচৰ বোজাত পৰা পৰিয়ালসমূহক সাহায্য প্ৰদান কৰিবলৈ চৰকাৰ আৰু বেচৰকাৰী সংস্থাসমূহক আহ্বান জনায় বিপিন ছেঠীয়ে ।
টাইপ ১ ডায়েবেটিছ : টাইপ ১ ডায়েবেটিছত শৰীৰত ইনচুলিন কম বা একেবাৰেই উৎপাদন নহয় । ইয়াত অগ্নাশয়ৰ কোষবোৰ ধ্বংস হয় । সাধাৰণতে সৰু ল’ৰা-ছোৱালী আৰু কিশোৰ-কিশোৰীৰ ক্ষেত্ৰত টাইপ ১ ডায়েবেটিছ হয় । অৱশ্যে কিছুমান মানুহৰ ক্ষেত্ৰত যিকোনো বয়সতে দেখা দিয়ে । ডায়েবেটিছ আংশিকভাৱে জিনীয় । বিশেষজ্ঞসকলৰ মতে, টাইপ ১ ডায়েবেটিছ ৰোগীয়ে সুস্থ হৈ থাকিবলৈ দৈনিক ইনচুলিন গ্ৰহণ কৰিব লাগিব ।
| মূখ্য বিষয়সমূহ | টাইপ ১ ডায়েবেটিছ | টাইপ ২ ডায়েবেটিছ |
| কাৰণ | শৰীৰত ইনচুলিন উৎপন্ন নহয় | শৰীৰে সঠিকভাৱে ইনচুলিন প্ৰয়োগ কৰিবলৈ সক্ষম নহয় |
| আৰম্ভণি | সাধাৰণতে কম বয়সৰ পৰাই আৰম্ভ হয় | সাধাৰণতে জীৱনৰ পিছৰ কালছোৱাত আৰম্ভ হয় |
| লক্ষণ | অত্যধিক পিয়াহ, সঘনাই প্ৰস্ৰাৱ কৰা, ভোক বৃদ্ধি, ওজন কমি যোৱা, ভাগৰুৱা হোৱা । | সাধাৰণতে জীৱনৰ পিচৰ সময়ছোৱাত আৰম্ভ হয় |
| প্ৰতিকাৰ | ইনচুলিন বেজী | খাদ্য, ব্যায়াম, ঔষধ আৰু কেতিয়াবা ইনচুলিন |
ইন্দোৰৰ কোকিলাবেন হাস্পতালৰ আভ্যন্তৰীণ চিকিৎসাৰ পৰামৰ্শদাতা ডাঃ সঞ্জয় জৈনে কয় যে টাইপ ১ ডায়েবেটিছ এটা স্থায়ী অৱস্থা । সঠিক ব্যৱস্থাপনা আৰু চিকিৎসাৰ দ্বাৰা এই ডায়েবেটিছত আক্ৰান্ত লোকসকলে স্বাভাৱিক জীৱন যাপন কৰিব পাৰে । টাইপ ১ ডায়েবেটিছ, য’ত শৰীৰৰ ৰোগ প্ৰতিৰোধ ক্ষমতাই অগ্নাশয়ৰ ইনচুলিন উৎপাদনকাৰী বিটা কোষক লক্ষ্য কৰি এন্টিব’ডি তৈয়াৰ কৰি ইনচুলিন উৎপাদন হ্ৰাস বা বন্ধ কৰি দিয়ে, যাৰ ফলত ৰক্ত শৰ্কৰাৰ মাত্ৰা অনিয়মিত হয় । টাইপ ১ ডায়েবেটিছ পিতৃ-মাতৃৰ যিকোনো এজনৰ পৰা জিনগতভাৱে উত্তৰাধিকাৰী সূত্ৰেও হ’ব পাৰে । টাইপ ১ ডায়েবেটিছৰ ক্ষেত্ৰত য’ত এজন পিতৃ-মাতৃৰ টাইপ ১ ডায়েবেটিছ থাকে, তেনে ক্ষেত্ৰত শিশুৰ ১০% আশংকা থাকে, আনহাতে মাতৃৰ বাবে ৮%ৰ পৰা ১০% আশংকা থাকে । যদি পিতৃ-মাতৃ দুয়োজনেই টাইপ ১ ডায়েবেটিছত আক্ৰান্ত হয় তেন্তে শিশুটিৰ এই অৱস্থা হোৱাৰ সম্ভাৱনা ৩০% বৃদ্ধি পায় ।
এনেদৰে কৰক শৰ্কৰা নিয়ন্ত্ৰণ: ডায়েবেটিছ ৰোগত আক্ৰান্ত লোকৰ বাবে শৰীৰৰ শৰ্কৰা নিয়ন্ত্ৰণ কৰাটো গুৰুত্বপূৰ্ণ । ইয়াৰ বাবে এজন ব্যক্তিয়ে বিশেষজ্ঞৰ পৰামৰ্শ লৈ ডায়েট গ্ৰহণ কৰিব লাগে । কেলৰি কম, চেনি কম আৰু আঁহযুক্ত খাদ্য খাব লাগে । প্ৰতিদিনে কমেও ৩০ মিনিট ব্যায়াম কৰক । চিকিৎসকে দিয়া ঔষধ সেৱন কৰক । যদি ওজন অত্যধিক হয় তেন্তে ইয়াক হ্ৰাস কৰাটো উচিত ।
