মুম্বাই : অভিনেতা ছৈফ আলী খানক আক্ৰমণ ৷ ঘৰত সোমাই চোকা অস্ত্ৰৰে আক্ৰমণ কৰে কোনো দুৰ্বৃত্তই ৷ প্ৰাপ্ত খবৰ অনুসৰি ছৈফক কেবাবাৰো চোকা অস্ত্ৰৰে আক্ৰমণ কৰা হৈছে ৷ বৰ্তমান অভিনেতাজনৰ অস্ত্ৰোপচাৰ চলি আছে ৷
তথ্য মতে, চুৰিৰ উদ্দশ্যেৰে মুম্বাইস্থিত তেওঁৰ ঘৰটোত প্ৰৱেশ কৰিছিল আক্ৰমণকাৰীয়ে ৷
- চোকা অস্ত্ৰৰে আক্ৰমণ অভিনেতা ছৈফ আলী খানক :
লাভ কৰা তথ্য অনুসৰি, বলীউডৰ ‘নবাব’ অভিনেতা ছৈফ আলী খানক ছুৰীৰে আক্ৰমণ কৰা হৈছে । মুম্বাইস্থিত অভিনেতা ছৈফ আলী খানৰ ঘৰটোত চুৰি কৰিবলৈ সোমাইছিল এজন অচিনাকি ব্যক্তি । পুৱতি নিশা ঘৰত শব্দ শুনি সতৰ্ক হৈ পৰে অভিনেতাজনৰ ঘৰুৱা কৰ্মচাৰীসকল ৷
অভিনেতাজন তেওঁৰ শোৱনি কোঠাত শুই আছিল আৰু সাৰ পাই শুনে যে তেওঁৰ সেৱকসকলে অনুপ্ৰৱেশকাৰীজনক চিঞৰি আছে । সেই সময়তে ছৈফ বাহিৰলৈ ওলাই আহি অচিনাকি লোকজনৰ সৈতে কাজিয়াত লিপ্ত হয় । হতাহতিৰ সময়তে আক্ৰমণকাৰীজনে এখন ছুৰী উলিয়াই খানক আক্ৰমণ কৰে ৷
- চিকিৎসা চলি আছে ছৈফ আলী খানৰ :
জানিব পৰা মতে, মুম্বাই আৰক্ষীয়ে বিষয়টোৰ তদন্ত কৰি আছে । তেওঁলোকে জনোৱা মতে, বান্দ্ৰাৰ নিজৰ ঘৰত পুৱতি নিশা সংঘটিত হোৱা এই ঘটনাৰ পিছত খানক মুম্বাইৰ লীলাৱতী হাস্পতালত ভৰ্তি কৰোৱা হয় আৰু তেওঁৰ অস্ত্ৰোপচাৰ আৰম্ভ কৰে চিকিৎসকে । ছুৰীৰে আক্ৰমণৰ পিছত ছৈফৰ কৰ্মচাৰীসকলৰ মাজত হুৱাদুৱা লাগে আৰু পৰিস্থিতিৰ সুযোগ লৈ আক্ৰমণকাৰী পলাই যায় । বৰ্তমান অভিনেতাজনৰ অৱস্থা স্থিৰ ।
54 বছৰীয়া অভিনেতাগৰাকীৰ জনসংযোগ প্ৰতিনিধিয়ে এক বিবৃতিত কয় যে ছৈফ আলী খানৰ বাসগৃহত চুৰিৰ চেষ্টা চলাইছিল অচিনাকি লোকে । বৰ্তমান চিকিৎসালয়ত তেওঁৰ অস্ত্ৰোপচাৰ চলি আছে ।
"আমি সংবাদ মাধ্যম আৰু অনুৰাগীসকলক ধৈৰ্য ধৰিবলৈ অনুৰোধ জনাইছো । এইটো এটা আৰক্ষীৰ বিষয় । আমি আপোনাক পৰিস্থিতিটোৰ বিষয়ে অৱগত কৰি থাকিম ৷" প্ৰতিনিধিজনে কয় ।
ছয়বাৰকৈ ছুৰীৰে আঘাত কৰা হয় ছৈফক :
অভিনেতাজনৰ দেহত ‘ছটা ছুৰীকাঘাত’ পোৱা গৈছে যাৰ ভিতৰত 'দুটা গভীৰ', লীলাৱতী চিকিৎসালয়ৰ চিকিৎসকে এটা নিউজৱায়াৰক এইদৰে কয় । লীলাৱতী চিকিৎসালয়ৰ চিঅ’অ’ ডাঃ নিৰজ উত্তমণীয়ে কৈছে যে ছৈফ এজন অচিনাক্ত ব্যক্তিয়ে তেওঁৰ বান্দ্ৰাৰ ঘৰত ছুৰীৰে আঘাত কৰে আৰু পুৱা 3.30 ছৈফক হাস্পতাললৈ অনা হয় । উত্তমণীয়ে কৈছে যে ছৈফ ছটা ছুৰীকাঘাত আছে আৰু দুটা গভীৰ । “এটা মেৰুদণ্ডৰ ওচৰত । তেওঁক নিউৰ’ছাৰ্জন ডাঃ নীতিন ডাংগে, কছমেটিক ছাৰ্জন ডাঃ লীনা জৈন, এনাস্থেচিয়া বিশেষজ্ঞ ডাঃ নিশা গান্ধীৰ নেতৃত্বত চিকিৎসকৰ এটা দলে অস্ত্ৰোপচাৰ কৰি আছে ৷”
কৰীণা কাপুৰ খানৰ দলৰ বিবৃতি প্ৰকাশ :
কৰীণা আৰু তেওঁলোকৰ দুই সন্তানো ঘৰত আছিল, অৱশ্যে তেওঁলোক নিৰাপদ । এতিয়া কৰীণাৰ দলটোৱে এক বিবৃতি প্ৰকাশ কৰিছে, “কালি নিশা ছৈফ আলী খান আৰু কৰীণা কাপুৰ খানৰ বাসগৃহত চুৰিৰ চেষ্টা কৰা হৈছিল । ছৈফৰ বাহুত আঘাত হৈছিল যাৰ বাবে চিকিৎসালয়ত আছে, প্ৰক্ৰিয়া চলি আছে । বাকীখিনি আমি সংবাদ মাধ্যম আৰু অনুৰাগীসকলক অনুৰোধ কৰিছো যে ধৈৰ্য ধৰিব আৰু আৰু জল্পনা-কল্পনা নকৰিব কাৰণ আৰক্ষীয়ে ইতিমধ্যে নিজৰ তদন্ত আৰম্ভ কৰিছে । আপোনালোক সকলোকে আপোনালোকৰ চিন্তাৰ বাবে ধন্যবাদ ৷”
প্ৰাৰম্ভিক তথ্য অনুসৰি, এজন অচিনাক্ত ব্যক্তিয়ে খানৰ ঘৰত প্ৰৱেশ কৰিছিল আৰু তেওঁলোক দুয়োৰে মাজত হতাহতি হৈছিল । ঘটনাটোৰ সময়ত অভিনেতাজনৰ পৰিয়ালৰ কিছু সদস্য ঘৰত উপস্থিত আছিল, এজন বিষয়াই এইদৰে জানিবলৈ দিয়ে । ঘটনাটোৰ পিছত ছৈফক বান্দ্ৰাৰ লীলাৱতী চিকিৎসালয়লৈ লৈ যোৱা হয় আৰু তেওঁ বিপদমুক্ত বুলি জানিব পৰা গৈছে, বিষয়াজনে এইদৰে কয় ।
আক্ৰমণৰ ঘটনাটোৰ বিষয়ে তথ্য পোৱাৰ পিছত, বান্দ্ৰা আৰক্ষী ঘটনাস্থলীত উপস্থিত হয় আৰু তদন্ত আৰম্ভ কৰে ।
ছৈফৰ আহিবলগীয়া চলচ্চিত্ৰসমূহ :
কৰ্মক্ষেত্ৰত, ছৈফক জুনিয়ৰ এনটিআৰ আৰু জাহ্নৱী কাপুৰ অভিনীত পেন-ইণ্ডিয়া ছবি দেৱৰা : অংশ 1 ত ভৈৰাৰ চৰিত্ৰত অভিনয় কৰা দেখা গৈছিল ৷ পৰৱৰ্তী সময়ত জুৱেল থিফ - দ্য ৰেড ছান চেপ্টাৰ শীৰ্ষক এখন হেইষ্ট থ্ৰিলাৰ আহি আছে । ৰবি গ্ৰেৱালৰ দ্বাৰা পৰিচালিত, আহিবলগীয়া চলচ্চিত্ৰখনত জয়দীপ আহলাৱতে মুখ্য চৰিত্ৰত অভিনয় কৰিব । খানৰ আহিবলগীয়া চলচ্চিত্ৰসমূহৰ ভিতৰত গো গোৱা গ'ন 2, শ্বুটআউট এট বাইকুল্লা আৰু ক্লিক শংকৰ অন্তৰ্ভুক্ত আছে । (এজেন্সিৰ ইনপুটৰ সৈতে)
