গুৱাহাটী,২৯ মে': অসমৰ ছবিপ্ৰেমীৰ বাবে সুখবৰ । প্ৰায় সংখ্যক অসমীয়া দৰ্শকৰে মনত সাঁচ বহুওৱা, ১৯৮৩ চনৰ ১৮ নৱেম্বৰত মুক্তিলাভ কৰা, অসমৰ ছবিজগতত তোলপাৰ লগোৱা ছবি হ'ল "ককাদেউতা নাতি আৰু হাতী" । এতিয়াও অসমীয়া ছবিপ্ৰেমী ৰাইজে গুণগুণাই ছবিখনৰ গীতসমূহ । বাৰে বাৰে উপভোগ কৰিও যেন আমনি নালাগে ছবিখন । ৪১ টা বসন্তৰ পাচত পুনৰ এবাৰ ৰূপালী পৰ্দাত দৰ্শকে উপভোগ কৰিব পাৰিব "ককাদেউতা নাতি আৰু হাতী" ।
শীঘ্ৰেই ছবিগৃহলৈ আহি আছে আশী দশকতে নিৰ্মিত অসমীয়া ছবি "ককাদেউতা নাতি আৰু হাতী" ৰ ছিকুৱেল "ককাদেউতা নাতি আৰু হাতী ২" । প্ৰাইড ইষ্ট এণ্টাৰটেইনমেণ্টছৰ বেনাৰত পুনৰবাৰ অসমবাসীয়ে উপহাৰ পাব এসময়ৰ জনপ্ৰিয় ছবিখনৰ ছিকুৱেল " ককাদেউতা নাতি আৰু হাতী ২"। সোমাবাৰে মহানগৰীৰ জ্যোতি চিত্ৰবনত অনুষ্ঠিত কৰা হয় ছবিখনৰ শুভ মহুৰত অনুষ্ঠান । মুখ্যমন্ত্ৰী ড৹ হিমন্ত বিশ্ব শৰ্মাৰ পৰিকল্পনাৰে তথা প্ৰাইড ইষ্ট এণ্টাৰটেইনমেণ্টছৰ পৰিচালন সঞ্চালিকা ৰিণিকি ভূঞা শৰ্মাৰ প্ৰযোজনাৰে আহিবলগীয়া অসমীয়া ছবি "ককাদেউতা নাতি আৰু হাতী ২" পৰিচালনা কৰিব অচিন্ত শংকৰে ।
আনহাতে ছবিখনত অভিনয় কৰিব জনপ্ৰিয় অভিনেতা যতীন বৰা, উৎপল দাস, বিবেক বৰা, কমল লোচন দাস, যশশ্ৰী ভূঞা আদিকে ধৰি বহুকেইগৰাকী ন-পুৰণি অভিনেতা-অভিনেত্ৰীয়ে । ছবিখনৰ চিত্ৰনাট্য তথা সংলাপ ৰাজদ্বীপৰ । ছবিখনৰ সংগীত পৰিচালক হিচাপে থাকিব অৰূপজ্যোতি বৰুৱা । কেমেৰাৰ দায়িত্বত আছে প্ৰদীপ দৈমাৰী । কেমেৰাৰ মাল্যৰ্পনে বুধবাৰৰ পৰা আৰম্ভ কৰা হয় ছবিখনৰ দৃশ্যগ্ৰহণ ।
