চিটাৰা ডেস্ক, 2 ছেপ্টেম্বৰ : 2024 চনৰ পেৰিছ অলিম্পিকত নিজৰ শক্তি প্ৰদৰ্শন কৰা ভাৰতৰ মল্লযুঁজাৰু কন্যা বিনেশ ফোগাটৰ সৈতে ভিডিঅ’ কলত কথা পাতে আমিৰ খানে । পেৰিছ অলিম্পিকত স্বৰ্ণ পদক লাভৰ পৰা বঞ্চিত হোৱা ভাৰতৰ মল্লযোদ্ধা কন্যা বিনেশ ফোগাট অলপতে দেশলৈ উভতি আহিছে । যেতিয়া 50 কিলোগ্ৰাম ফ্ৰীষ্টাইল কুস্তিত ফাইনেলত প্ৰৱেশ কৰা বিনেশ 100 গ্ৰামও অধিক ওজনৰ বাবে চূড়ান্ত খেলৰ পৰা বাহিৰ হৈছিল, সমগ্ৰ দেশবাসী হতাশ হৈ পৰিছিল । সাধাৰণ মানুহৰ পৰা বলীউডৰ তাৰকালৈকে, সকলোৱে বিনেশ ফোগাটক তেওঁৰ সাহসৰ বাবে অভিবাদন জনাইছিল । এতিয়া বিনেশ ফোগাট আৰু বলীউড তাৰকা আমিৰ খানৰ কথোপকথনৰ ভিডিঅ’ ছচিয়েল মিডিয়াত ভাইৰেল হৈ পৰিছে ।
এই ভিডিঅ’টোত, আমিৰ খানক পেৰিছ অলিম্পিকত তেওঁৰ প্ৰশংসনীয় খেলৰ বাবে মল্লযোদ্ধা বিনেশক অভিনন্দন জনোৱা দেখা গৈছে । প্ৰাক্তন মল্লযোদ্ধা কৃপা শংকৰকো এই ভাইৰেল ফটো আৰু ভিডিঅ’ত দেখা গৈছে । আমিৰ খানৰ সৈতে কথা পতাৰ পিচত বিনেশৰ মুখত এটি হাঁহি দেখিবলৈ পোৱা গৈছে । ভাইৰেল হোৱা ফটো আৰু ভিডিঅ’ক লৈ ছ'চিয়েল মিডিয়া ব্যৱহাৰকাৰীসকলৰ প্ৰতিক্ৰিয়া আহিবলৈ আৰম্ভ কৰিছে । এজন ব্যৱহাৰকাৰীয়ে লিখিছে, ‘এনে লাগিছে যে ডংগল 2 আহি আছে ।’ আন এজন ব্যৱহাৰকাৰীয়ে লিখিছে, ‘চেম্পিয়ন ৷’ তৃতীয় ব্যৱহাৰকাৰীয়ে লিখিছে, ‘এইটো আমিৰ আৰু বিনেশৰ বাবে এক বিশেষ মুহূৰ্ত হ'ব ।’ সমান্তৰালকৈ বহুতো ব্যৱহাৰকাৰীয়ে ডংগল 2 দাবী কৰিছে ।
2016 চনত আমিৰ খানে ডংগল ছবিখন কৰিছিল, য’ত তেওঁ প্ৰাক্তন মল্লযুঁজাৰু মহাবীৰ ফোগাটৰ চৰিত্ৰত অভিনয় কৰিছিল । প্ৰাক্তন মল্লযুঁজাৰু মহাবীৰ সিং ফোগাটৰ ভতিজী বিনেশ ফোগাট । ভাৰতীয় চিনেমাৰ সৰ্বাধিক উপাৰ্জনকাৰী ছবি (2 হাজাৰ কোটিতকৈ অধিক) হৈছে ডংগল 2 । এতিয়া আমিৰ খানৰ অনুৰাগীসকলে আগ্ৰহেৰে অপেক্ষা কৰি আছে ডংগল 2 ছবিখনৰ বাবে । আনহাতে আমিৰ খানক 2022 চনত লাল সিং চাড্ডা ছবিখনত দেখা গৈছিল আৰু এতিয়া তেওঁ নিজৰ প্ৰডাকশ্যন হাউছত ছানী দেওলৰ সৈতে 1947 চনৰ লাহোৰ ছবিখন কৰিলে আৰু এই ছবিখনৰ মুক্তিৰ তাৰিখলৈ অপেক্ষা কৰি থকা হৈছে ।
লগতে পঢ়ক : ৰিয়া চক্ৰৱৰ্তীৰ পডকাষ্টত উচুপি উঠিল মিষ্টাৰ পাৰ্ফেকশ্যনিষ্ট - Aamir Khan Chapter 2 podcast
