নিউজ ডেস্ক, 2 অক্টোবৰ: দেশখনত 2000 টকাৰ গুলপীয়া নোটৰ ওপৰত নিষেধাজ্ঞা আৰোপ কৰাৰ ডেৰ বছৰৰো অধিক সময় হ'ল। কিন্তু মানুহৰ ওচৰত এতিয়াও 70 কোটি টকাৰ অধিক মূল্যৰ এই নোট আছে। ভাৰতীয় ৰিজাৰ্ভ বেংকে অক্টোবৰৰ প্ৰথম দিনটোত এই নোটবোৰৰ ওপৰত এক ডাঙৰ আপডেট দিয়াৰ সময়ত কৈছে যে প্ৰচলন প্ৰত্যাহাৰ কৰাৰ পিছত মুঠ প্ৰচলিত 2000 টকাৰ নোটৰ 98 শতাংশ ঘূৰাই পোৱা গৈছে।
2 শতাংশ নোট এতিয়াও আহিবলৈ বাকী
মঙলবাৰ, 1 অক্টোবৰ, 2024 তাৰিখে, আৰবিআইয়ে প্ৰচলনৰ বাহিৰত থকা 2000 টকাৰ নোটৰ তথ্য ভাগ বাটোৱাৰা কৰি কয় যে মুঠ 98 শতাংশ নোট বেংকলৈ ঘূৰাই দিয়া হৈছে। ৰিজাৰ্ভ বেংকৰ মতে,মানুহৰ ওচৰত এতিয়াও 7,117 কোটি টকাৰ গুলপীয়া নোট আছে। এই নোটবোৰ প্ৰচলনৰ পৰা আঁতৰাই নিয়াৰ পিছত, প্ৰাৰম্ভিক পৰ্যায়ত সেইবোৰ দ্ৰুতভাৱে বেংকত জমা হৈ আছিল। কিন্তু এতিয়া সেইবোৰ অতি লাহে লাহে ঘূৰি আহি আছে।
কেতিয়া আৰু কিয় 2000 টকাৰ নোট প্ৰত্যাহাৰ কৰা হৈছিল?
স্বচ্ছ নোট নীতিৰ অধীনত, ভাৰতীয় ৰিজাৰ্ভ বেংকে 19 মে 2023 তাৰিখে দেশৰ সৰ্বাধিক মূল্যৰ এই 2000 টকাৰ নোট প্ৰত্যাহাৰ কৰাৰ কথা ঘোষণা কৰিছিল। ইয়াৰ পিছত, কেন্দ্ৰীয় বেংকে 23 মেৰ পৰা 30 ছেপ্টেম্বৰ 2023 লৈ স্থানীয় বেংক আৰু 19 টা আৰবিআই আঞ্চলিক কাৰ্যালয়ত এই নোটবোৰ ঘূৰাই দিবলৈ আৰু সলনি কৰিবলৈ সময় দিছিল। অৱশ্যে, ইয়াৰ পিছতো সময়সীমা নিৰন্তৰভাৱে বৃদ্ধি কৰা হৈছিল।
আপুনি এতিয়াও 2,000 টকাৰ নোট জমা কৰিব পাৰে
যদিহে আপোনাৰ হাতত এতিয়াও এই নোটবোৰ আছে তেনেহ’লে এতিয়াও সেইবোৰ সলনি কৰিব পাৰি। অৱশ্যে, এই কাম স্থানীয় বেংকত কৰিব নোৱাৰিব। ভাৰতীয় ৰিজাৰ্ভ বেংকে ইতিমধ্যে স্পষ্ট কৰি দিছে যে এই গুলপীয়া নোটবোৰ ইণ্ডিয়া পোষ্টৰ জৰিয়তে নিকটতম যিকোনো ডাকঘৰত জমা কৰিব পাৰি, ইয়াৰ উপৰিও আহমেদাবাদ, বেংগালুৰু, বেলাপুৰ, ভূপাল, ভূৱনেশ্বৰ, চণ্ডিগড়, চেন্নাই, গুৱাহাটী, হায়দৰাবাদ, জয়পুৰ, জম্মু, কানপুৰ, কলকাতা, লক্ষ্ণৌ, মুম্বাই, নাগপুৰ, নতুন দিল্লী, পাটনা আৰু তিৰুৱন্তপুৰমত অৱস্থিত ১৯ টা আৰবিআই কাৰ্যালয়ত জমা কৰিব পাৰি।
