টাৱাং: অৰুণাচল প্ৰদেশৰ টাৱাং জিলাৰ ভাৰত-চীন সীমান্তত প্ৰচণ্ড শীতৰ মাজতে পৰ্যটকৰ লানি নিছিগা ভিৰ । ভাৰত-চীন সীমান্তত দুয়োখন দেশৰ সেনাই পহৰা দিয়া অঞ্চলত প্ৰকৃতিৰ মনোৰম ৰূপ চাবলৈ দেশ-বিদেশৰ বিভিন্ন পৰ্যটক ঢাপলি মেলিছে । সীমান্ত অঞ্চলত বৰফৰ আচ্ছাদনৰ মাজতে সেনা জোৱানসকলে পৰ্যটকসকলক সহায়ৰ হাত আগবঢ়াইছে ।
টাৱাং তিনিটা আন্তঃৰাষ্ট্ৰীয় সীমান্তৰ লগত থকা এখন পাহাৰীয়া অতি উচ্চতাৰ এখন মনোৰম ঠাই । জিলাখন তিব্বত-চীন-ভূটানৰ সীমান্তত অৱস্থিত । পশ্চিম অৰুণাচল প্ৰদেশৰ টাৱাং জিলাৰ পৰা প্ৰায় 50 কিলোমিটাৰ উত্তৰে ভাৰত-চীন সীমান্তৰ মেক মোহন লাইনৰ দুয়োপাৰে দুয়োখন দেশৰ সেনাৰ নিজা পোষ্ট আছে ।
সাগৰপৃষ্ঠৰ পৰা 15,200 ফুট উচ্চতাত থকা এই সীমান্তত উত্তাপ 8 ডিগ্ৰী চেলচিয়াছ যদিও অঞ্চলটো পৰ্যটকৰ বাবে বৰ্তমান মুকলি ৰখা হৈছে । অক্টোবৰ মাহৰ পৰা এই স্থানলৈ পৰ্যটকৰ সোঁত বয় । প্ৰাকৃতিক সৌন্দৰ্যৰে ভৰপূৰ প্ৰচণ্ড শিলাখণ্ড আৰু বৰফৰ শুকুলা আচ্ছাদনৰ মাজত এই স্থানত ভাৰতীয় সেনাই ৰক্ষণাবেক্ষণ দিয়াৰ লগতে পৰ্যটনৰ ক্ষেত্ৰত অৰুণাচল প্ৰদেশৰ চৰকাৰ যথেষ্ট উপকৃত হৈছে ।
দৈনিক প্ৰায় 100 ৰ পৰা 200 পৰ্যটকৰ ভিৰ হয় এই স্থানত । ভাৰতীয় সেনাই পৰ্যটকৰ বাবে বিভিন্ন সুবিধা প্ৰদান কৰাৰ লগতে বৃদ্ধ লোকক হুইল চেয়াৰেৰে সীমান্ত পৰিদৰ্শন কৰায় ।
উল্লেখযোগ্য যে অৰুণাচল প্ৰদেশে চীনৰ লগত প্ৰায় 1129 কিলোমিটাৰ দৈৰ্ঘ্যৰ সীমান্ত ভাগ কৰিছে । চীনে বহুবাৰ অৰুণাচল প্ৰদেশৰ কেবাটাও সৰু সৰু ভাগত সোমাই আগ্ৰাসন কৰিবলৈ চেষ্টা কৰা অভিযোগ উঠিছিল । দেশৰ সাধাৰণ নিৰ্বাচনৰ পূৰ্বে চীনৰ অসামৰিক পৰিক্ৰমা মন্ত্ৰালয়ে প্ৰকাশ কৰা শেহতীয়া তালিকাত অৰুণাচল প্ৰদেশৰ 30 টা স্থানৰ নতুন নাম সন্নিবিষ্ট কৰিছিল ৷ ইয়াৰ ভিতৰত 11 টা আৱাসিক এলেকা, 12 টা পাহাৰ, চাৰিখন নদী, এটা হ্ৰদ, এটা মাউণ্টেইন পাছ আৰু এটুকুৰা মাটি ৷
চাউথ চাইনা মৰ্নিং পোষ্টৰ বাতৰি অনুসৰি সকলো নাম চীনা আখৰ, তিব্বতী আৰু মেণ্ডেৰিন চীনা ভাষাৰ ৰোমান বৰ্ণমালাৰ সংস্কৰণত দিয়া হৈছিল ৷ চীনে প্ৰথমে 2017 চনত অৰুণাচল প্ৰদেশৰ ছটা স্থানৰ নতুন নামৰ তালিকা প্ৰকাশ কৰিছিল ৷ ইয়াৰ পিছত 2021 চনত দ্বিতীয়খন 15 টা স্থানৰ তালিকা আৰু তাৰ পিছত 2023 চনত 11 টা স্থানৰ বাবে তৃতীয় তালিকা প্ৰকাশ কৰিছিল ৷ চীনে অৰুণাচল প্ৰদেশক জাংনান বা দক্ষিণ তিব্বত বুলি উল্লেখ কৰে, যি ভূখণ্ড বেইজিঙে তিব্বত স্বায়ত্তশাসিত অঞ্চলৰ অংশ বুলি দাবী কৰে ৷ মেণ্ডেৰিন চীনা ভাষাত জাঙে (Zang) তিব্বতক বুজায় আৰু “নান” মানে দক্ষিণ ৷
লগতে পঢ়ক: মুকলি হ'ল বহু প্ৰত্যাশিত কামেং সংস্কৃতি আৰু ঐতিহ্য সংগ্ৰহালয়
