নেশ্যনেল ডেস্ক, 2 জুলাই : সোমবাৰে লোকসভাত বিৰোধী দলৰ নেতা ৰাহুল গান্ধীয়ে কেন্দ্ৰীয় চৰকাৰক লক্ষ্য কৰি আগবঢ়োৱা ভাষণৰ কিছু অংশ অধ্যক্ষৰ নিৰ্দেশত সংসদৰ কাৰ্যবিৱৰণীৰ পৰা প্ৰত্যাহাৰ কৰা হয় । লোকসভাত বিৰোধী দলপতিগৰাকীয়ে সংখ্যালঘু, NEET বিতৰ্ক আৰু অগ্নিপথ আঁচনিকে ধৰি বিভিন্ন বিষয়ত কেন্দ্ৰীয় চৰকাৰক লক্ষ্য কৰি প্ৰদান কৰা প্ৰথম ভাষণৰ কেইবাটাও অংশ অধ্যক্ষৰ নিৰ্দেশত সংসদৰ কাৰ্যবিৱৰণীৰ পৰা প্ৰত্যাহাৰ কৰা হৈছে ।
গুচাই পেলোৱা অংশসমূহৰ ভিতৰত আছে হিন্দু, প্ৰধানমন্ত্ৰী নৰেন্দ্ৰ মোদী-বিজেপি-আৰএছএছ আদি সন্দৰ্ভত ৰাহুল গান্ধীৰ মন্তব্য । সোমবাৰে বিজেপিৰ ‘জয় শ্ৰীৰাম’ ধ্বনিৰ মাজতে ৰাহুল গান্ধীয়ে লোকসভাত ‘জয় সংবিধান’ শ্ল’গানেৰে ভাষণ আৰম্ভ কৰে ।
হিন্দু ধৰ্ম মানে ভয়, ঘৃণা, মিছা কথা বিয়পোৱা নহয় বুলি দৃঢ়তাৰে দাবী কৰি গান্ধীয়ে বিজেপিয়ে আগবঢ়োৱা হিন্দু মূল্যবোধৰ ব্যাখ্যাৰ বাবে দলটোক সমালোচনা কৰে । হিন্দু, ইছলাম, শিখ, খ্ৰীষ্টান, বৌদ্ধ আৰু জৈন ধৰ্মৰ প্ৰসংগ উত্থাপন কৰি গান্ধীয়ে ভগৱান শিৱ, গুৰু নানক আৰু যীচু খ্ৰীষ্টৰ ছবি তুলি লৈ নিৰ্ভীকতাৰ গুৰুত্ব সন্দৰ্ভত আলোকপাত কৰে ।
শাসকীয় পক্ষৰ সাংসদসকলে বিৰোধী দলপতিগৰাকীৰ এই বক্তব্যৰ প্ৰতিবাদ কৰাৰ সময়ত ৰাহুলে বিজেপিক সমালোচনা কৰি কয়, "আপুনি হিন্দু নহয় । হিন্দু ধৰ্মত স্পষ্টকৈ লিখা আছে যে সত্যৰ সৈতে থিয় দিব লাগে আৰু সত্যৰ পৰা পিছুৱাই যাব নালাগে বা ভয় খাব নালাগে ।" এই সন্দৰ্ভত যেতিয়া প্ৰধানমন্ত্ৰীয়ে হস্তক্ষেপ কৰে তেতিয়া ৰাহুল গান্ধীয়ে কয়, "বিজেপি, আৰএছএছ বা মোদী হিন্দু ধৰ্মৰ ৰক্ষক নহয় ।’’
এই প্ৰসংগৰ পিছতে গান্ধীয়ে প্ৰধানমন্ত্ৰী মোদীয়ে মহাত্মা গান্ধীৰ জীৱন সম্বন্ধিত চিনেমাখন সন্দৰ্ভত আগবঢ়োৱা মন্তব্যৰ প্ৰতিক্ৰিয়া আগবঢ়াই কয়, "এয়া প্ৰধানমন্ত্ৰী মোদীৰ অজ্ঞানতা ৷ জাতিৰ পিতা অমৰ ।"
