নেশ্যনেল ডেস্ক, 26 জুলাই: উত্তৰাখণ্ডত ধাৰাসাৰ বৰষুণ ৷ জিলাখনত হোৱা ধাৰাসাৰ বৰষুণৰ ফলত ব্যাহত হৈ পৰিছে সাধাৰণ জনজীৱন । ধাৰাসাৰ বৰষুণৰ ফলত হোৱা বানৰ বাবে যমুনোত্ৰী ধামৰ মন্দিৰ চৌহদত বৃহৎ পৰিমাণৰ ক্ষতিসাধন হৈছে । মন্দিৰ কমিটীৰ কাৰ্যালয়, পাকঘৰ আদিও ক্ষতিগ্ৰস্ত হৈছে । ইয়াৰ লগতে ৰাতি জাংকিচট্টি অঞ্চলত হোৱা ধাৰাসাৰ বৰষুণৰ ফলত জাংকিচট্টিত মটৰ চাইকেল পৰ্যন্ত উটুৱাই লৈ যায় । জাংকিচট্টি পাৰ্কিঙৰ তলত হোৱা ভূমিকম্প আৰু শুভম প্লেচ হোটেলৰ সন্মুখৰ পথত থকা দেৱাল ক্ষতিগ্ৰস্ত হয় । এই তথ্য লাভ কৰাৰ পিছতে আৰক্ষীৰ দলটোৱে সেই স্থানত উপস্থিত হৈছে ।
ধাৰাসাৰ বৰষুণৰ ফলত যমুনা নদীৰ পানী বঢ়াৰ ফলত যমুনোত্ৰী ধাম চৌহদকে ধৰি আশে-পাশে থকা অঞ্চলত যথেষ্ট ক্ষতিসাধন হৈছে । যাৰ বাবে ৰাইজৰ মাজত আতংকৰ সৃষ্টি হৈছিল । ইয়াৰ লগতে, যমুনাত্ৰী ধামৰ অন্তিমটো ডাঙৰ ষ্টপেজ জাংকিচট্টিত যমুনা নদীৰ ওপৰত থকা খাৰশালি গাঁৱলৈ যোৱা দলং পোৱাৰ আগৰ অংশত ভূমিস্খলন ঘটে । বৰ্তমান পৰ্যন্ত কোনো লোকৰ হতাহতিৰ তথ্য পোহৰলৈ অহা নাই । পুৰোহিত মহাসভাৰ সভাপতি পুৰুষোত্তম ইউনিয়ালে কয়, "কোনো লোকৰ ক্ষতি হোৱা নাই, কিন্তু সম্পত্তিৰ ক্ষয়-ক্ষতি হৈছে ।"
যমুনা নদীৰ মুখত ধ্বংসাৱশেষ, শিল আদি জমা হোৱাৰ ফলত মন্দিৰ কমপ্লেক্সটোৰ বৃহৎ ক্ষতি হৈছে বুলি জানিব পৰা গৈছে । জাংকিচট্টিৰ ৰাম মন্দিৰৰ সমীপত থকা পঞ্জীয়ন কেন্দ্ৰটোও ক্ষতিগ্ৰস্ত হৈছে ।
মহকুমাধিপতি মুকেশ চন্দ্ৰ ৰামোলাই কয়, "কোনো লোকে প্ৰাণ হেৰুওৱা নাই । কিন্তু সা-সম্পত্তিৰ বহুত ক্ষয়-ক্ষতি হৈছে । ওজৰি ডাবৰকোট পথ মুকলি হোৱাৰ লগে লগে ক্ষয়-ক্ষতিৰ মূল্যায়ন কৰা হ’ব ।"
