নিউজ ডেস্ক, ২১ ছেপ্টেম্বৰ : ২০২৪-২৫ বিত্তীয় বৰ্ষৰ মূলধনী ব্যয়ৰ (capital expenditure, Capex) লক্ষ্য নিৰ্ধাৰিত সময়সীমাৰ ভিতৰত পূৰণ কৰাটো নিশ্চিত কৰিবলৈ আহ্বান জনাইছে বিত্ত মন্ত্ৰীয়ে । কেন্দ্ৰীয় বিত্ত মন্ত্ৰী নিৰ্মলা সীতাৰমণে গৃহ আৰু নগৰ পৰিক্ৰমা মন্ত্ৰণালয়ক এই নিৰ্দেশ প্ৰদান কৰিছে ।
শুকুৰবাৰে মন্ত্ৰণালয়ৰ বিষয়াসকলৰ সৈতে অনুষ্ঠিত বৈঠকত বিত্ত মন্ত্ৰীয়ে এই কথাত জোৰ দি কয় যে ২৮,৬২৮ কোটি টকাৰ বাজেট আৱণ্টন বিত্তীয় বৰ্ষটোৰ শেষলৈকে সম্পূৰ্ণ ব্যৱহাৰ কৰিব লাগে ৷ কেন্দ্ৰীয় বাজেটত গুৰুত্বপূৰ্ণ কেপেক্স আৱণ্টন থকা মন্ত্ৰণালয় আৰু বিভাগসমূহৰ সৈতে চলি থকা পৰ্যালোচনা শৃংখলাৰ অংশ হিচাপে বিত্ত মন্ত্ৰীয়ে নতুন দিল্লীত এক পৰ্যালোচনা বৈঠকত এই পুঁজিসমূহৰ সময়মতে আৰু দক্ষ ব্যৱহাৰৰ প্ৰয়োজনীয়তাৰ ওপৰতো গুৰুত্ব প্ৰদান কৰে ।
এক্সৰ এটা পোষ্টত বিত্ত মন্ত্ৰণালয়ে কয়, "কেন্দ্ৰীয় বিত্ত আৰু কৰ্প'ৰেট পৰিক্ৰমা মন্ত্ৰী নিৰ্মলা সীতাৰমণে আজি নতুন দিল্লীত গৃহ আৰু নগৰ পৰিক্ৰমা মন্ত্ৰণালয়ৰ বাজেট নিৰ্ধাৰিত মূলধনী ব্যয় কেপেক্স মূল্যাঙ্কন কৰিবলৈ গৃহ আৰু নগৰ পৰিক্ৰমা মন্ত্ৰণালয়ৰ এক পৰ্যালোচনা বৈঠকত সভাপতিত্ব কৰে ।"
মন্ত্ৰণালয়ৰ মতে, এই বৈঠকত আলোচনাৰ এক মুখ্য অংশ হৈছে নগৰাঞ্চলত সুলভ আৱাস প্ৰদান কৰাৰ উদ্দেশ্যে প্ৰৱৰ্তন কৰা প্ৰধানমন্ত্ৰী আৱাস যোজনা (নগৰ) আঁচনিৰ ওপৰত গুৰুত্ব দিয়া । সীতাৰমণে নগৰীয়া ভাৰতত বৰ্ধিত আৱাসৰ প্ৰয়োজনীয়তা পূৰণৰ বাবে এই আঁচনিৰ অধীনত অগ্ৰগতি ত্বৰান্বিত কৰাৰ প্ৰয়োজনীয়তাৰ ওপৰতো গুৰুত্ব আৰোপ কৰে ।
তেওঁ গৃহ আৰু নগৰ পৰিক্ৰমা মন্ত্ৰণালয়ৰ বিষয়াসকলক পি এম এ ৱাই (নগৰ) কাৰ্যসূচীৰ অধীনত নিৰ্ধাৰিত লক্ষ্য পূৰণৰ বাবে সকলো প্ৰয়োজনীয় ব্যৱস্থা গ্ৰহণ কৰাটো নিশ্চিত কৰিবলৈ আহ্বান জনায় । গৃহ নিৰ্মাণৰ উপৰি বিত্ত মন্ত্ৰীয়ে নগৰ পৰিবহণ আন্তঃগাঁথনিৰ ওপৰতো গুৰুত্ব আৰোপ কৰে ।
তেওঁ মেট্ৰ' ৰে'ল আৰু আঞ্চলিক দ্ৰুত পৰিবহণ ব্যৱস্থাৰ (Regional Rapid Transit System, RRTS) দৰে প্ৰকল্পৰ বাবে আৱণ্টিত কেপেক্স লক্ষ্য পূৰণ কৰাৰ প্ৰয়োজনীয়তাৰ ওপৰত আলোকপাত কৰে । নগৰৰ গতিশীলতা উন্নত কৰা আৰু চহৰসমূহত বৰ্ধিত ভিৰ হ্ৰাস কৰাৰ বাবে এই প্ৰকল্পবোৰ গুৰুত্বপূৰ্ণ ।
মন্ত্ৰণালয়ে লগতে কয়, "বিত্তমন্ত্ৰী নিৰ্মলা সীতাৰমণে নগৰ পৰিবহণৰ বিষয়ৰ ওপৰতো গুৰুত্ব আৰোপ কৰি বিষয়াসকলক মেট্ৰ' ৰে'ল আৰু আঞ্চলিক দ্ৰুত পৰিবহণ ব্যৱস্থাৰ (আৰ আৰ টি এছ) বাবে আৱণ্টিত কেপেক্স লক্ষ্য পূৰণ কৰিবলৈ আহ্বান জনায় ।"
উল্লেখ্য যে, এই পৰ্যালোচনা বৈঠকখন বিভিন্ন মন্ত্ৰণালয় আৰু বিভাগৰ দ্বাৰা কেপেক্স পুঁজিৰ কাৰ্যকৰী ব্যৱহাৰ নিৰীক্ষণ আৰু নিশ্চিত কৰাৰ বাবে বিত্ত মন্ত্ৰণালয়ে গ্ৰহণ কৰি থকা প্ৰচেষ্টাৰ অংশ আছিল । বিত্ত মন্ত্ৰীয়ে লগতে কয় যে সমগ্ৰ দেশতে অৰ্থনৈতিক বিকাশ আৰু নগৰীয় আন্তঃগাঁথনি উন্নত কৰাৰ বাবে এই প্ৰকল্পসমূহ সময়মতে কাৰ্যকৰী কৰাটো অপৰিহাৰ্য ।
