آندھرا-تلنگانہ میں شدید بارش کا سلسلہ جاری، دونوں ریاستوں میں 19 افراد ہلاک، مختلف اضلاع کےلئے ریڈ الرٹ - Heavy rain in AP and Telangana

خلیج بنگال میں بننے والے طوفان کے اثر سے آندھراپردیش اور تلنگانہ میں موسلادھار بارش کا سلسلہ جاری ہے۔ ندیاں اور نالے لبریز ہوگئے ہیں۔ حالات کا جائزہ لینے کےلئے آندھراپردیش کے وزیراعلیٰ چندرا بابو نائیڈو اور تلنگانہ کے وزیراعلیٰ ریونت ریڈی نے اجلاس منعقد کئے۔

حیدرآباد : خلیج بنگال میں ہوا کے کم دباؤں کی وجہ سے آندھرا پردیش میں بارش سے متعلق واقعات میں اب تک دونوں ریاستوں میں 19 افراد ہلاک ہوگئے۔ آندھرا پردیش کے مختلف علاقوں میں 10 افراد جبکہ تلنگانہ کے مختلف علاقوں میں 9 افراد ہلاک ہوئے ہیں۔ وجئے واڑہ میں لینڈ سلائیڈنگ کی وجہ سے چار افراد کی موت ہوگئی۔ چیف منسٹر چندرا بابو نائیڈو نے اس سلسلہ میں ایک اجلاس منعقد کرکے حالات کا جائزہ لیا۔ انہوں نے عہدیداروں کو ہدایت دی کہ وہ چوکس رہیں۔ انہوں نے مرنے والوں کے لواحقین کو 5 لاکھ روپے ایکس گریشیا دینے کا بھی اعلان کیا۔ ہندوستانی محکمہ موسمیات (آئی ایم ڈی) کے عہدیداروں نے بتایا کہ جمعہ کی رات سے آندھرا پردیش میں وجئے واڑہ سمیت کئی مقامات پر گزشتہ 24 گھنٹوں میں مسلسل شدید بارش کی پیش قیاسی کی ہے۔ وزیراعلیٰ نے تمام محکموں کو ہائی الرٹ کردیا اور بھاری بارش والے علاقوں میں اسکولوں میں تعطیل کا اعلان کردیا۔

وہیں تلنگانہ میں بھی موسلادھار بارش کا سلسلہ جاری ہے جبکہ آئندہ 48 گھنٹوں تک بارش کی پیش قیاسی کی گئی ہے۔ مختلف اضلاع کے علاوہ حیدرآباد میں زبردست بارش ہورہی ہے جہاں کئی سڑکیں زیر آب آ گئیں۔ حکام نے کہ نشیبی علاقوں میں رہنے والے لوگوں کو الرٹ رہنے کی ہدایت دی۔ لوگوں کو محفوظ مقامات پر منتقل ہونے کا مشورہ دیا گیا۔ ضلع کلکٹر نے پیر 2 ستمبر کو حیدرآباد کے تعلیمی اداروں میں تعطیل کا اعلان کیا ہے۔

وزیراعلیٰ ریونت ریڈی نے عہدیداروں کو چوکس رہنے اور شدید بارش کے پیش نظر تمام ضروری اقدامات کرنے کی ہدایت دی۔ حیدرآباد کے سکندرآباد، ونستھلی پورم، دلسکھ نگر، اپل، تارناکہ، خیریت آباد، مہدی پٹنم، کوکٹ پلی، لنگم پلی، گچی باولی، ہائی ٹیک سٹی، بنجارہ ہلز، جوبلی ہلز، نامپلی، یاقوت پورہ، دبیر پورہ، ملک پیٹ، چارمینار، چندرائن گٹہ، فلک نما وغیرہ میں شدید بارش کی وجہ سے سڑک زیر آب آگئیں اور ٹریفک میں خلل پڑا۔ حیدرآباد سے وجئے واڑہ جانے والی گاڑیوں کو کھمم کی طرف موڑ دیا گیا کیونکہ ہائی وے پر پانی جمع ہوگیا تھا۔

حیدرآباد ضلع کے انچارج وزیر پونم پربھاکر نے شدید بارش کی پیش گوئی کے پیش نظر عہدیداروں کو الرٹ کردیا ہے۔ جی ایچ ایم سی، ایچ ایم ڈی اے، واٹر ورکس، ڈی آر ایف اور این ڈی آر ایف کی ٹیمیں کو مختلف علاقوں میں تعینات کیا گیا۔ اس دوران تلنگانہ کے مختلف اضلاع میں بھی شدید بارش کی اطلاعات موصول ہورہی ہیں جہاں موسلادھار بارش کی وجہ سے عام زندگی پوری طرح درہم برہم ہوگئی۔