دسویں فیل ہو کر پی ایچ ڈی کیلئے درخواست، تاج محل میں پانی ٹپکنے پر اویسی کا وقف معاملے پر طنز - Owaisi on Taj Mahal

اے آئی ایم آئی ایم کے صدر اسد الدین اویسی نے تاج محل کے مرکزی گنبد سے پانی کے نکلنے کے وائرل ویڈیو پر ردعمل دیتے ہوئے کہا کہ 'جو لوگ تاج محل نہیں سنبھال پا رہے ہیں، وہ وقف جائیدادیں بھی سنبھالنا چاہ رہے ہیں۔ انہوں نے اس کے لیے ایک محاورے کا استعمال کرتے ہوئے کہا کہ ' یہ دسویں فیل کی پی ایچ ڈی کے لیے درخواست دینے کے مترادف ہے۔' غور طلب ہے کہ یہ ویڈیو حال ہی میں سوشل میڈیا پر منظر عام پر آیا ہے۔

نئی دہلی: آل انڈیا مجلس اتحاد المسلمین (اے آئی ایم آئی ایم) کے صدر اسد الدین اویسی نے تاج محل کے مرکزی گنبد سے پانی ٹپکنے کے وائرل ویڈیو پر ردعمل دیتے ہوئے آرکیالوجیکل سروے آف انڈیا (اے ایس آئی) کو عالمی ثقافتی ورثہ کی یادگار کے تحفظ میں مبینہ ناکامی کا ذمہ دار ٹھہرایا۔

حیدرآباد کے رکن پارلیمنٹ نے سوشل میڈیا پلیٹ فارم پر لکھا کہ وقف کی زمینوں کو ان کے حوالے کر دیا جائے تاکہ وہ انہیں برقرار رکھ سکیں، دسویں جماعت کے امتحان میں ناکام ہونا پی ایچ ڈی کے لیے درخواست دینے کے مترادف ہے۔

اے ایس آئی نے کیا کہا؟

اے ایس آئی کے ایک سینئر اہلکار نے تاج محل کے مرکزی گنبد سے پانی کے اخراج کی وجہ آگرہ میں مسلسل بارش کو قرار دیا اور مرکزی چھت کو کسی ساختی نقصان سے انکار کیا۔

اے ایس آئی آگرہ سرکل کے سپرنٹنڈنٹ چیف راج کمار پٹیل نے خبر رساں ایجنسی پی ٹی آئی کو بتایا کہ ہاں، ہم نے مرکزی گنبد میں رساؤ دیکھا ہے، اس کے بعد جب ہم نے چھان بین کی تو پتہ چلا کہ یہ رساو بارش کی وجہ سے ہو رہا ہے اور اس میں کوئی نقصان نہیں ہوا ہے۔

20 سیکنڈ کی ویڈیو وائرل:

گزشتہ جمعرات کو مرکزی گنبد کے سفید سنگ مرمر سے بارش کے پانی کے رسنے کی 20 سیکنڈ کی ویڈیو وائرل ہوئی تھی، جس کے بعد کئی لوگوں نے یادگاری عمارت کے ساختی استحکام پر تشویش کا اظہار کیا تھا۔

حکومت سے منظور شدہ ٹور گائیڈ نے کہا کہ عمارت کی مناسب دیکھ بھال کی جانی چاہیے کیونکہ یہ سیاحت کی صنعت میں لوگوں کے لیے واحد امید ہے۔ انہوں نے مقامی معیشت میں عمارت کی اہمیت پر بھی زور دیا کیونکہ یہ سیاحت کی صنعت میں کام کرنے والوں کو سینکڑوں ملازمتیں فراہم کرتا ہے۔