Student Jump from Apartment: కడుపునొప్పి భరించలేక అపార్ట్‌మెంట్​ పైనుంచి దూకిన విద్యార్థిని.. తీవ్రగాయాలతో ఆస్పత్రికి

Student Jump from Apartment Building : ఇటీవల బీరం శ్రీధర్ రెడ్డి పాఠశాలలో ఓ విద్యార్థి పాఠశాల భవనం పైనుంచి కిందపడి మృతి చెందిన ఘటన మరువక ముందే కడప నగరంలో మరో విద్యార్థిని మూడో అంతస్తు మేడ పైనుంచి దూకి ఆత్మహత్యకు యత్నించింది. ఎన్జీవో కాలనీలోని ఆక్స్‌ఫర్డ్‌ పాఠశాలలో పదో తరగతి చదువుతున్న విద్యార్థిని సంగీత.. మధ్యాహ్నం భోజన విరామం తర్వాత కడుపునొప్పిగా ఉందని చెప్పి బయటికి వెళ్లి, పాఠశాల ఎదురుగా ఉన్న అపార్ట్మెంట్ ​పైనుంచి కిందికి దూకింది. విషయం తెలుసుకున్న పాఠశాల యాజమాన్యం హుటా హుటిన స్థానికంగా ఉన్న ప్రైవేట్ ఆసుపత్రికి తరలించి చికిత్స అందిస్తున్నారు. తలకు తీవ్ర గాయాలైనట్లు వైద్యులు తెలిపారు. విద్యార్థిని తల్లిదండ్రులు, పోలీసులు ఆసుపత్రికి చేరుకుని పరిస్థితిని సమీక్షించారు. కడప ఆర్డీవో ధర్మచంద్రా రెడ్డి ఆసుపత్రికి చేరుకుని విద్యార్థిని ఆరోగ్య పరిస్థితిని వైద్యులను అడిగి తెలుసుకున్నారు. సంగీత తల్లిదండ్రులు నిరుపేదలు కావడంతో ప్రభుత్వం తరఫున ఆమెకు మెరుగైన వైద్య సేవలు అందిస్తామని ఆర్డీవో హామీ ఇచ్చారు.