తెలంగాణ:వాగులో మహిళ గల్లంతు.. గాలింపు చర్యలు ముమ్మరం

తెలంగాణ జోగులాంబ గ‌ద్వాల‌ జిల్లాలో శుక్ర‌వారం రాత్రి నుంచి విస్తారంగా వ‌ర్షాలు కురుస్తున్నాయి. కొన్ని ప్రాంతాల్లో ఎడ‌తెరిపి లేకుండా వాన ప‌డుతోంది. ఫలితంగా జిల్లాలోని వాగులు, వంక‌ల‌కు వ‌ర‌ద పోటెత్తింది. క‌లుగొట్ల వాగు స‌మీపంలో ప్ర‌యాణిస్తున్న ఓ కారు వ‌ర‌ద‌లో కొట్టుకుపోయింది.

తెలంగాణ జోగులాంబ గద్వాల జిల్లా ఉండవెల్లి మండలం కలుగొట్ల వాగులో ఓ మహిళ గల్లంతయ్యింది. ఉద్ధృతంగా ప్రవహిస్తున్న వాగులో కారుతో పాటు కొట్టుకుపోయింది.కడప జిల్లా ఎర్రకుంట్ల మండలం సుంకేసుల గ్రామానికి చెందిన శివ‌కుమార్​రెడ్డి అనే వ్య‌క్తి బెంగళూరులో సాఫ్ట్​వేర్​ ఇంజినీర్​గా పనిచేస్తున్నాడు. ఈ క్రమంలో హైదరాబాద్​లో పని నిమిత్తం త‌న భార్య సింధూరెడ్డి, డ్రైవర్​ జిలానీ బాషాతో క‌లిసి బెంగ‌ళూరు నుంచి హైద‌రాబాద్‌కు శుక్ర‌వారం రాత్రి బ‌య‌ల్దేరాడు.

శ‌నివారం తెల్ల‌వారుజామున పుల్లూరు మీదుగా హైవే ఎక్కేందుకు క‌లుగొట్ల వాగు వైపు వెళ్లారు. రాత్రి కురిసిన భారీ వర్షానికి వాగులో వ‌ర‌ద ఉద్ధృతి పెరిగి.. కారు కొట్టుకుపోయింది. ఈ ప్ర‌మాదం నుంచి శివ‌కుమార్ రెడ్డి, జిలానీ బాషా సుర‌క్షితంగా బ‌య‌ట‌ప‌డగా.. సింధూరెడ్డి వ‌ర‌ద నీటిలో గ‌ల్ల‌తైంది.

వాగు వ‌ద్ద‌కు చేరుకున్న స్థానికులు, పోలీసులు స‌హాయ‌క చ‌ర్య‌లు చేప‌ట్టారు. మ‌హిళ ఆచూకీ కోసం పోలీసులు, రెవెన్యూ సిబ్బంది, అగ్నిమాపక సిబ్బంది గాలింపు చ‌ర్య‌లు ముమ్మ‌రం చేశారు. ఆర్డీవో రాములు, డీఎస్పీ యాదగిరి ఆధ్వర్యంలో ఉండ‌వెల్లి సీఐ వెంక‌ట్రామ‌య్య ప‌రిస్థితిని స‌మీక్షిస్తున్నారు. త‌న భార్య కోసం శివ‌కుమార్ రెడ్డి తీవ్ర ఆందోళ‌న‌ చెందుతున్నాడు. విషయం తెలుసుకున్న అలంపూర్​ ఎమ్మెల్యే అబ్రహం ఘటనా స్థలానికి చేరుకుని వివరాలను తెలుసుకున్నారు. గాలింపు చర్యలను పరిశీలించారు.