సీఎం జగన్ తాడేపల్లిలోని తన క్యాంపు కార్యాలయంలో సోమవారం సొంత నియోజకవర్గమైన పులివెందుల ప్రాంత అభివృద్ధి సంస్థ(పాడా)పై సమీక్షించారు. పులివెందులలోని ఏపీ - కార్ల్‌ సంస్థలో ఈ నెల 24న గుజరాత్‌ రాష్ట్రం ఆనంద్‌ ప్రాంతానికి చెందిన గ్రామీణ మేనేజ్‌మెంట్‌ సంస్థ (ఇర్మా)కు శంకుస్థాపన చేయనున్నట్లు జగన్ తెలిపారు.
‘గండి క్షేత్రం వీరాంజనేయస్వామి ఆలయంలో రూ.21 కోట్లతో చేపట్టిన అభివృద్ధి పనులు వెంటనే పూర్తి చేయాలి. 24 దేవాలయాల పునర్నిర్మాణంతోపాటు కొత్తగా ఎస్సీ, ఎస్టీ, బీసీ కాలనీల్లో 26 ఆలయాలు నిర్మించాలి. పులివెందులలో అంతర్జాతీయ ప్రమాణాలతో పాఠశాల, సీటీ సెంటర్‌, వధశాలల నిర్మాణం చేపట్టాలి. అన్ని లేఅవుట్లలో మంచినీరు, మురుగునీటి పారుదల పనులు పూర్తి చేయాలి. రింగ్‌రోడ్డును మరింత ఆకర్షణీయంగా తీర్చిదిద్దాలి’ అని సీఎం సూచించారు.