పశ్చిమగోదావరి జిల్లా తాడేపల్లిగూడెం నుంచి వివిధ వ్యవసాయ ఉత్పత్తులు ఉత్తర భారతదేశానికి ఎగుమతి చేసేలా కేంద్రం కిసాన్ రైలును రెండు నెలల కింద ప్రారంభించింది. ఇక్కడి నుంచి కోడిగుడ్లు, ఉల్లి, ఇతర పండ్లు దేశంలోని వివిధ రాష్ట్రాలకు ఎగుమతి అవుతున్నాయి. ఈ రైలు ఏర్పాటుతో రైతులకు గిట్టుబాటు ధరలు లభిస్తున్నాయి. సరైన సమయానికి కిసాన్ రైలు నడపకపోవడంతో కొన్న ఉల్లిని నిల్వ చేసుకోలేక... స్థానిక మార్కెట్లో విక్రయించలేక.. వ్యాపారులు నష్టపోతున్నారు. ఫలితంగా రైతుల వద్ద నుంచి ఉల్లి కొనుగోలు చేయడం లేదు. ఈ ప్రభావం ధరలపై పడుతోందని వ్యాపారులు ఆవేదన వ్యక్తం చేస్తున్నారు.
తాడేపల్లిగూడెం వ్యవసాయ మార్కెట్‌... రాష్ట్రంలోనే అతిపెద్ద ఉల్లి మార్కెట్‌గా పేరుగాంచింది. రాయలసీమ, కోస్తాంధ్ర, తెలంగాణ నుంచి రోజూ సుమారు 250 టన్నుల ఉల్లి మార్కెట్‌కు వస్తోంది. ఇక్కడి నుంచి అస్సాం, బీహార్, దిల్లీ, పశ్చిమబంగా, మధ్యప్రదేశ్, ఉత్తరప్రదేశ్, ఒడిశా ప్రాంతాలకు ఉల్లి ఎగుమతి అవుతోంది. గతంలో లారీల ద్వారా సరుకును ఆయా రాష్ట్రాలకు వ్యాపారులు తరలించేవారు. దీని వల్ల రవాణా వ్యయం పెరిగి నష్టపోయేవారు. దీంతో గిరాకీ తగ్గి.. మార్కెట్లో ధరలు పడిపోయేవి. దీన్ని దృష్టిలో ఉంచుకునే కేంద్ర ప్రభుత్వం కిసాన్ రైలును అందుబాటులోకి తీసుకొచ్చింది. ఈ రెండు నెలల కాలంలోనే 37 రైళ్ల ద్వారా ఉల్లిని ఇతర ప్రాంతాలకు రవాణా చేశారు. దీంతో సుమారు 4 కోట్ల రూపాయల ఆదాయం తాడేపల్లిగూడెం రైల్వేస్టేషన్‌కు సమకూరింది. కానీ ప్రస్తుతం కొన్ని కారణాలతో రైళ్లు అందుబాటులో లేకపోవడంతో ఎగుమతుల్లేక ఉల్లి.. కుళ్లిపోతోందని రైతులు, వ్యాపారులు వాపోతున్నారు.