విశాఖలో ఎన్టీఆర్ జయంతి వేడుకలు

విశాఖ జిల్లావ్యాప్తంగా ఎన్టీఆర్ జయంతి వేడుకలు ఘనంగా నిర్వహించారు. పార్టీ శ్రేణులు, కార్యకర్తలు కార్యక్రమంలో పాల్గొని ఎన్టీఆర్ కు నివాళులర్పించారు.

విశాఖ జిల్లా మాడుగుల నియోజకవర్గంలో నందమూరి తారక రామారావు 96 వ జయంతి వేడుకలు ఘనంగా నిర్వహించారు. ఈ వేడుకల్లో మాజీ మంత్రి రెడ్డి సత్యనారాయణ పాల్గొన్నారు. పార్టీ శ్రేణులతో కలిసి ఆయన ఎన్టీఆర్ విగ్రహానికి పూలమాల వేశారు. మాడుగులలో తెలుగుదేశం పార్టీ ఎమ్మెల్యే అభ్యర్థి, మాజీ శాసనసభ్యుడు గవిరెడ్డి రామానాయుడు పాల్గొని ఎన్టీఆర్ కు నివాళులర్పించారు. కార్యక్రమంలో పార్టీ శ్రేణులు, కార్యకర్తలు పాల్గొన్నారు.

నర్సీపట్నంలో ఎన్టీఆర్​ జయంతి కార్యక్రమంలో పాల్గొన్న మాజీ మంత్రి చింతకాయల అయ్యన్నపాత్రుడు ... రాజకీయాలకు సరికొత్త నిర్వచనం తీసుకువచ్చిన వ్యక్తి దివంగత నాయకులు ఎన్టీఆర్ అని అన్నారు. ఎన్నికల్లో తెలుగుదేశం పార్టీ పరాజయం చెందినంత మాత్రాన కార్యకర్తలు నాయకులు నిరుత్సాహ పడాల్సిన అవసరం లేదని పిలుపునిచ్చారు. త్వరలో జరగబోయే స్థానిక సంస్థల ఎన్నికల్లో తెదేపాను గెలిపించేందుకు గ్రామ స్థాయి నాయకులు కృషి చేయాలని పిలుపునిచ్చారు.