ఆంధ్రప్రదేశ్ రిజిస్ట్రేషన్ల శాఖ కొత్త సర్వీసును అందుబాటులోకి తీసుకువచ్చింది. ప్రస్తుతం ఏదైనా ఆస్తి క్రయ విక్రయాలకు సంబంధించి సబ్ రిజిస్ట్రార్ కార్యాలయంలో రిజిస్ట్రేషన్ చేసుకుంటే ప్రస్తుతం డాక్యుమెంట్ ఇస్తున్నారు. ఇకపై దానితోపాటు ఎంకంబరెంట్ సర్టిఫికెట్(ఈసీ) ఇవ్వాలని ప్రభుత్వం నిర్ణయించింది. ఇందుకు సంబంధించి ఈ నెల 17న ఉత్తర్వులు జారీ చేసింది.
నూతనంగా ప్రవేశపెట్టిన ఈ విధానం వల్ల ఎలాంటి ఫీజు లేకుండా ఈసీ పొందవచ్చు. దీనివల్ల ప్రభుత్వ రికార్డుల్లో తమ పేరుతో ఆస్తి రిజిస్టర్ అయి ఉందని కొనుగోలుదారులకు నమ్మకం కలుగుతుందని.. అందుకే ఈ నిర్ణయం తీసుకున్నట్లు అధికార వర్గాలు చెబుతున్నాయి. అయితే రిజిస్ట్రేషన్ సమయంలో కాకుండా వేరే అవసరాల కోసం ఈసీకి దరఖాస్తు చేస్తే రూ. 120 చెల్లించాల్సి ఉంటుందని అధికారులు స్పష్టం చేశారు.