Inhuman incident in Tirupati district: తిరుపతి జిల్లా చంద్రగిరి మండలంలో అమానుష ఘటన చోటు చేసుకుంది. తన భార్యతో వివాహేతర సంబంధం పెట్టుకున్నాడని ఆవేదన చెందిన భర్త.. తన భార్య, ఆమె ప్రియుడు మృతి చెందారని సోషల్ మీడియా వేదికగా ఓ పోస్ట్ చేశాడు. ఆ పోస్ట్‌ను వీక్షించిన భార్య ప్రియుడు ఆగ్రహంతో రగిలిపోయి.. అతన్ని అమానుషంగా కొట్టి, మూత్రం పోసి గుండు కొట్టించారు. ఈ ఘటన ఆలస్యంగా వెలుగులోకి రావడంతో జిల్లా వ్యాప్తంగా చర్చనీయాంశంగా మారింది.
వివరాల్లోకి వెళ్తే.. తిరుపతి జిల్లా చంద్రగిరి మండలం ఏ రంగంపేటకు చెందిన హరికృష్ణ నాయుడు కుమారుడు వంశీ చంద్రగిరిలో అద్దె ఆటోను నడుపుకుంటూ జీవనం సాగించేవాడు. ఈ క్రమంలో అతనికి సోషల్ మీడియా ద్వారా తెలంగాణ రాష్ట్రంలోని కరీంనగర్ జిల్లాకు చెందిన ఓ మహిళతో మూడేళ్ల క్రితం పరిచయం ఏర్పడింది. ఆ పరిచయం కాస్త ప్రేమగా మారి. వివాహానికి దారి తీసింది. ఈ క్రమంలో ఆటో యజమాని అన్వర్.. వంశీ ఇంటికి అప్పుడప్పుడు వస్తూ పోతూ ఉండేవాడు. ఆ క్రమంలోనే అన్వర్.. వంశీ భార్యతో వివాహేతర సంబంధాన్ని ఏర్పరచుకున్నాడు.
దీంతో వంశీ భార్య రెండు నెలల క్రితం.. పుట్టింటికి వెళుతున్నానని చెప్పి ప్రియుడు అన్వర్ చెంతకు చేరింది. వంశీ బతుకు తెరువు కోసం ఆటోను వదిలి బెంగళూరులో కూలి పని చేసుకుంటూ జీవనం సాగిస్తున్నాడు. తన భార్య అన్వర్ చెంతకు చేరిందన్న విషయం తెలిసి.. రహస్యంగా విచారణ చేశాడు. ఇద్దరికి అక్రమ సంబంధం ఉండడాన్ని నిర్ధారించుకున్నాడు. దీంతో ఆగ్రహించిన భర్త వంశీ.. ఫేస్‌బుక్‌లో తన భార్య, ఆమె ప్రియుడు అన్వర్ చనిపోయినట్లు 'రిప్' అని పోస్ట్ చేశాడు.