Delhi Liquor Scam : దేశవ్యాప్తంగా సంచలనం రేపిన దిల్లీ మద్యం కుంభకోణం కేసులో ఒంగోలు వైసీపీ ఎంపీ మాగుంట శ్రీనివాసులురెడ్డి కుమారుడు మాగుంట రాఘవకు రౌస్ అవెన్యూ కోర్టు జ్యుడీషియల్‌ రిమాండ్ విధించింది. మనీలాండరింగ్‌ కేసులో అరెస్టు చేసిన రాఘవను ఈడీ 10 రోజుల కస్టడీకి తీసుకున్న విషయం తెలిసిందే. నేటితో కస్టడీ గడువు ముగియడంతో రాఘవకు రౌస్ అవెన్యూ కోర్టు.. జ్యుడీషియల్‌ రిమాండ్ విధించింది. మార్చి 4వ తేదీ వరకు జ్యుడీషియల్‌ రిమాండ్‌లో ఉంటారు. కోర్టు ఆదేశాల మేరకు రాఘవను తిహాడ్‌ జైలుకు తరలించారు. దర్యాప్తుకు సహకరించడం లేదని ఈనెల 10న సాయంత్రం ఆరుగంటల సమయంలో మాగుంట రాఘవను ఈడీ అధికారులు తమ కస్టడీలోకి తీసుకుని.. అరెస్టు చేస్తున్నట్లు ప్రకటించారు. మరుసటి రోజు.. రౌస్ అవెన్యూ కోర్టులో హజరుపరిచి.. పది రోజుల కస్టడీకి తీసుకున్నారు.
కస్టడీ ముగియడంతో.. రాఘవను ఈడీ అధికారులు కోర్టులో హజరుపరచగా.. 14 రోజుల జ్యుడీషియల్‌ రిమాండ్ను మార్చి 4 వరకు విధిస్తూ.. ఆదేశాలు ఇచ్చింది. ఇదే కేసులో అరెస్టు అయిన రాజేష్‌ జోషికి కూడా రిమాండ్ విధించింది. మద్యం కుంభకోణం వ్యవహారంలో ఇప్పటివరకు సీబీఐ, ఈడీ అరెస్టు చేసిన.. నిందితులు అందరికీ జ్యుడీషియల్‌ రిమాండ్ విధించింది. తమకు బెయిల్ మంజూరు చేయాలని.. సమీర్ మహేంద్రు, విజయ్ నాయర్, అభిషేక్ బోయినపల్లి, శరత్ చంద్రా రెడ్డి, బినోయ్ బాబులు దాఖలు చేసిన బెయిల్ పిటిషన్లను సీబీఐ ప్రత్యేక కోర్టు తిరస్కరిస్తూ.. ఈనెల 16న ఉత్తర్వులు జారీ చేసింది.