యజమానిని మోసగించి పరారైన దొంగలు అరెస్ట్

నమ్మకంగా పనిచేస్తున్నట్లు నమ్మించి.. యజమానిని మోసగించి నగదుతో పరారైన దొంగలను నెల్లూరు పోలీసులు అరెస్ట్ చేశారు. వీరి వద్ద నుంచి రూ.25 లక్షలు స్వాధీనం చేసుకున్నారు.

నెల్లూరు నగరంలో ఆటోనగర్​కు చెందిన మాధవ్..... శ్రీ వెంకటేశ్వర లారీ ట్రాన్స్​పోర్ట్​లో డ్రైవర్​గా పనిచేస్తున్నాడు. మార్చి 29న డ్రైవర్ మాధవ్​కు, లారీ యజమాని రమేష్, ఓ ఖాతాదారునికి నగదు అందజేయాలని రూ.80 లక్షల 80వేలు ఇచ్చాడు. ఇదే అదనుగా భావించిన మాధవ్.... తన స్నేహితులు నిర్మల రాయ్, శివప్రసాద్ రెడ్డి, అన్వర్​లతో కలిసి నగదు మొత్తాన్ని కాజేయాలని ప్లాన్ వేశాడు.

ఎన్నికల కోడ్ ఉన్నందున ఆ నగదును గోనెసంచిలో మూటకట్టి లారీలో తీసుకెళ్తుండగా ఈ చోరీకి పాల్పడ్డారు. మాధవ్ స్నేహితులు వెనక నుంచి లారీ ఎక్కి, నగదు మూటను ఎత్తుకెళ్లారు. కేసు నమోదు చేసుకున్న పోలీసులు నిందితుడిని పట్టుకుని రూ. 19.37 లక్షల నగదు, రూ. 6.13 లక్షల విలువైన బంగారు ఆభరణాలను స్వాధీనం చేసుకున్నారు.