నెల్లూరు జిల్లా కోవూరు నియోజకవర్గంలో జరిగిన 2 రోడ్డు ప్రమాదాల్లో ఐదుగురు గాయపడగా, ఇద్దరి పరిస్థితి విషమంగా ఉంది. బుచ్చిరెడ్డిపాలెం మండలం దామరమడుగు వద్ద గాజుల బండిని స్కూటర్ ఢీకొన్న ప్రమాదంలో ముగ్గురు గాయాలపాలయ్యారు. వీరిలో ఒకరి పరిస్థితి విషమంగా ఉండగా.. చికిత్స కోసం ఆసుపత్రికి తరలించారు.
కొడవలూరు మండలం రామన్నపాలెం జాతీయ రహదారిపై కారు, లారీ ఢీకొన్న ఘటనలో ఇద్దరు తీవ్రంగా గాయపడగా, ఒకరి పరిస్థితి విషమంగా ఉంది. ప్రమాదంలో కారు ముందు భాగం పూర్తిగా ధ్వంసమైంది. ఘటన స్థలాన్ని పరిశీలించిన పోలీసులు కేసు నమోదు చేసి దర్యాప్తు చేస్తున్నారు.