అమరావతినే ఏకైక రాజధానిగా ప్రకటించాలని ప్రజలు పెద్ద ఎత్తున ఆందోళన చేస్తున్నారు. ప్రభుత్వం నిర్ణయం తీసుకోవాలని... లేనిపక్షంలో ఉద్యమాలు ఉద్దృతం చేస్తామన్నారు.
అధికార వికేంద్రీకరణ సరికాదు...
అభివృధ్ధి వికేంద్రీకరణకు వ్యతిరేకం కాదని... అధికార వికేంద్రీకరణ సరికాదని ప్రత్యేక హోదా విభజన హామీల సాధన సమితి అధ్యక్షుడు చలసాని శ్రీనివాస్ అన్నారు. అమరావతి కావాలని ఇక్కడి రైతులు అడగలేదు... ఇప్పుడు అధికారం ఉందని రూపుదిద్దుకున్న ప్రాంతాన్ని వికేంద్రీకరణ చేస్తామనటం సరికాదన్నారు. వెనుకబడిన ప్రాంతాల అభివృద్దికి ఇస్తామన్న నిధులు వీటిపై ఎందుకు మాట్లాడారని అన్నారు.
రైతుల పాదయాత్ర
గుంటూరు జిల్లా నరసరావుపేట మండలం అల్లూరివారిపాలెం గ్రామంలో రైతులు పాదయాత్ర నిర్వహించారు. రాజధానిగా అమరావతిని కొనసాగించాలంటూ నినాదాలు చేశారు. ముందుగా గ్రామంలో సేవ్ అమరావతి పేరుతో ర్యాలీ నిర్వహించారు. ప్రభుత్వం మూడు రాజధానుల ప్రక్రియ పక్కనపెట్టి ఉన్న రాజధాని అమరావతిని అభివృద్ధి చేసే దిశగా ఆలోచించాలని కోరారు. అభివృద్ధి వికేంద్రీకరణ చేయాలి తప్ప రాజధానుల వికేంద్రీకరణ వల్ల ఉపయోగమేమీ ఉండదన్నారు. 13 జిల్లాలకు మూడు రాజధానులుంటే 75 జిల్లాలు ఉన్న ఉత్తరప్రదేశ్కు ఎన్ని రాజధానులు ఉండాలని ప్రశ్నించారు. రాజధానికి మద్దతుగా రాష్ట్రంలోని ప్రతి ఒక్కరూ కదలి రావాలని అల్లూరివారిపాలెం రైతులు, యువత పిలుపునిచ్చారు.
కేంద్రానికిఎమ్మెల్యే అనగాని లేఖ
అమరావతి కోసం ఆందోళన చేస్తున్న రైతులు, మహిళలపై పోలీసులు దుర్మార్గంగా వ్యవహరిస్తున్నారని... గుంటూరు జిల్లా రేపల్లె ఎమ్మెల్యే అనగాని సత్యప్రసాద్ కేంద్ర హోంశాఖ మంత్రికి లేఖ రాశారు. శాంతియుతంగా నిరసనలు తెలియజేస్తున్న వారిని అక్రమంగా అరెస్ట్ చేస్తూ ఉద్యమాన్ని అణచివేయాలని ప్రభుత్వం కుట్ర చేస్తోందని లేఖలో ఆరోపించారు. అర్దరాత్రి సమయాల్లో రైతుల ఇళ్లలోకి చొరబడి సంక్రాంతికి వచ్చిన బంధువుల వివరాలు చెప్పాలని సోదాలు చేస్తూ భయానక వాతావరణం సృష్టిస్తున్నారని విమర్శించారు. రాజధాని గ్రామాల్లో నిరసన తెలిపేందుకు టెంట్లు వేసుకోవడానికి కూడా పోలీసులు అనుమతించడం లేదన్నారు.