ఇళ్ల స్థలాల వేటలో అధికారుల కొత్తబాట..!

ఉపయోగంలో లేవన్న కారణంతో చెరువులు, కుంటలు, వాగులు, కాలువలను పూడ్చి ఇళ్ల స్థలాలుగా మార్చేందుకు అధికారులు ప్రయత్నిస్తున్నారు. దశాబ్దాల నుంచి చెరువులు, కుంటలు, వాగులు, కాలువలు వినియోగంలో లేవని, ఆ ఛాయలే అక్కడ కనిపించడం లేదని, ఇళ్ల స్థలాలుగా మార్చేందుకు అనుమతి ఇవ్వాలని కోరుతూ సుమారు 1,500 ఎకరాలకు సంబంధించి 350 రకాల ప్రతిపాదనలు జిల్లాల నుంచి ప్రభుత్వానికి అందాయి. తూర్పుగోదావరి, పశ్చిమగోదావరి, కృష్ణా జిల్లాల నుంచి ఈ ప్రతిపాదనలు ఎక్కువ సంఖ్యలో వచ్చాయి.

ఉగాది నాటికి 25 లక్షల మంది లబ్ధిదారులకు ఉచిత ఇళ్ల స్థలాలు ఇవ్వాలని ప్రభుత్వం లక్ష్యంగా పెట్టుకుంది. సాధ్యమైనంత వరకు ప్రభుత్వ భూమినే ఉపయోగించాలని అధికారులు ప్రయత్నిస్తున్నారు. ఇందులో భాగంగానే చెరువులు, కుంటలు, వాగులు, కాలువలపై దృష్టి పెట్టారు. భూముల రికార్డుల్లో చెరువులు, కుంటలు, వాగులు, కాలువలుగా ఉన్నప్పటికీ... దశాబ్దాల నుంచి వినియోగంలో లేవని ప్రభుత్వానికి ప్రతిపాదనలు పంపినట్లు కృష్ణా జిల్లా అధికారి ఒకరు చెప్పారు. ఇటువంటి ప్రతిపాదనలే గుంటూరు, ప్రకాశం జిల్లాల నుంచి ప్రభుత్వానికి రాబోతున్నట్లు తెలిసింది.

సహజ సిద్ధంగా ఏర్పడిన చెరువులు, కాలువలు, వాగులను ఇతర అవసరాలకు మళ్లించకూడదని సుప్రీంకోర్టు స్పష్టమైన తీర్పు ఇచ్చింది. అధికారులు ఇవి ఉపయోగంలో లేవని తెలిపేందుకు వీలుగా నీటి పారుదల, పంచాయతీ, రెవెన్యూశాఖల అధికారులతో కలిసి ఉమ్మడిగా ప్రతిపాదనలను తయారుచేసి ప్రభుత్వానికి పంపుతున్నారు. వీటిపై ఎలాంటి నిర్ణయం తీసుకోవాలన్న అంశంపై సచివాలయ అధికారులు న్యాయశాఖతో సంప్రదింపులు జరుపుతున్నారు. అడ్వొకేట్‌ జనరల్‌ అభిప్రాయాన్ని తీసుకుని అధికారికంగా నిర్ణయం తీసుకోబోతున్నారు.

రైతుల వ్యతిరేకత

కృష్ణా జిల్లా లక్ష్మీపురం గ్రామానికి చెందిన పలువురు రైతులు డ్రైనేజీ పోరంబోకు భూములను తరతరాలుగా సాగు చేసుకుంటున్నారు. ఈ భూములను ఆక్రమణల పేరుతో ప్రభుత్వం స్వాధీనం చేసుకుని ఇళ్ల స్థలాలకు ఇవ్వడమేమిటని ప్రశ్నిస్తూ పురుగు మందుల డబ్బాలతో రైతులు ఆందోళనకు దిగారు. ఇటువంటి పరిస్థితులే రాష్ట్రంలో పలుచోట్ల నెలకొన్నాయి.

*38 చెరువులు.. 230 ఎకరాలు.. జల వనరులశాఖ, పంచాయతీరాజ్‌శాఖల పరిధిలోని సుమారు 64 చెరువులను పోరంబోకు స్థలంగా బదలాయించడానికి తూర్పుగోదావరి జిల్లా అధికారులు ప్రతిపాదించారు. ఆయా చెరువుల పరిధిలో 230 ఎకరాల భూములున్నట్లు సమాచారం.

*ఉప్పాడ కొత్తపల్లి మండలంలో 54 ఎకరాల చెరువు భూములను అధికారులు గుర్తించారు. పంట భూములుగా మారిన ఈ చెరువులో గతేడాది వరకు సాగు చేసేవారు. ఈ ఏడాది సాగు చేయవద్దని రెవెన్యూ అధికారుల నుంచి సంబంధిత రైతులకు సూచనలు వెళ్లాయి.

*ఏలేశ్వరం మండలంలోని సిరిపురం ఊర చెరువును తాజాగా రెవెన్యూ, జల వనరులశాఖ అధికారులు పరిశీలించారు. ఈ భూమి స్వాధీనానికి ప్రయత్నం జరుగుతోందన్న ఆందోళనతో దీనిపైనే ఆధారపడి జీవిస్తున్నామంటూ రైతులు ఇటీవల కలెక్టర్​ను ఆశ్రయించారు.

పనికిరాని చెరువులే: అధికారులు

ఎలాంటి నీటి వనరులు, నీటి నిల్వలకు అవకాశం లేని చెరువులనే పరిశీలిస్తున్నామని అధికారులు పేర్కొంటున్నారు. వర్షాలు వచ్చినా ఆయా చెరువుల్లోకి నీరు చేరే పరిస్థితి లేదని చెబుతున్నారు. వీటిలో కొన్నిచోట్ల ఇప్పటికే ఆక్రమణలున్నాయని అంటున్నారు. కొందరు ఇళ్లు కట్టుకుంటే.. మరికొందరు పంట పొలాలుగా మార్చేశారని వివరించారు. ఇలాగే వదిలేస్తే మరింత అన్యాక్రాంతమయ్యే ప్రమాదం ఉందని అధికారులు పేర్కొంటున్నారు.