వలస కార్మికులకు వాహనం ఏర్పాటు

లాక్​డౌన్ ప్రభావం​ వలస కూలీలపై తీవ్రంగా పడింది. పొట్ట కూటి కోసం కూలీనాలీ చేసుకునేందుకు ఇతర ప్రాంతాలకు వచ్చిన వారంతా.... పనులు లేక ఇబ్బందులు పడుతున్నారు. ​తూర్పు గోదావరి జిల్లా దిండి వద్ద రైల్వే వంతెన పనులు చేసేందుకు వచ్చిన కార్మికులు కాలినడకన సొంత ఊళ్లకు వెళ్లేందుకు పయనమయ్యారు. మార్గ మధ్యలో వారిని చూసిన ఎమ్మెల్యే చిట్టిబాబు అమలాపురం ఆర్టీవో బీహెచ్​ భవాని శంకర్​తో మాట్లాడి వారిని స్వగ్రామాలకు వాహనంలో పంపించారు.

తూర్పు గోదావరి జిల్లా మలికిపురం మండలం దిండి వద్ద రైల్వే వంతెన నిర్మాణ పనులు చేసేందుకు జిల్లాలోని చింతూరుకు చెందిన 12 మంది వలస కార్మికులు వచ్చారు. కొన్ని నెలలుగా వారంతా రైల్వే వంతెన పనులు చేస్తున్నారు. లాక్​డౌన్​ కారణంగా పనులు నిలుపుదల చేయగా.. స్వగ్రామానికి కాలినడకన వెళ్లేందుకు కార్మికులు పయనమయ్యారు. పి.గన్నవరం నియోజకవర్గం పరిధిలోని పెద్ద కందాలపాలెం వద్ద కార్మికులను చూసిన ఎమ్మెల్యే చిట్టిబాబు వారితో మాట్లాడారు.

ప్రజా రవాణా నిలిపివేసినందున కాలినడకన స్వగ్రామాలకు వెళ్తున్నట్లు వారు తెలిపారు. ఈ మేరకు స్పందించిన ఎమ్మెల్యే భోజనం ఏర్పాటు చేశారు. అనంతరం అమలాపురం ఆర్టీవో బీహెచ్​ భవాని శంకర్​తో మాట్లాడారు. కార్మికులను స్వగ్రామాలకు వాహనంలో పంపించారు. ఇందుకు సహకరించిన అధికారులకు ఎమ్మెల్యే కొండేటి చిట్టిబాబు కృతజ్ఞతలు తెలిపారు.

ఇదీ చూడండి: