'శ్రీవారి వైకుంఠ ద్వార దర్శనం రెండు రోజులే'

తిరుమల శ్రీవారి ఆలయంలో వైకుంఠ ద్వార దర్శనం రెండు రోజుల పాటు మాత్రమే అమలు కానుంది. ఈ మేరకు గత సంప్రదాయాన్నే కొనసాగించాలని తితిదే ధర్మకర్తల మండలి నిర్ణయించింది. ప్రస్తుతం తితిదే ఆగమ సలహామండలి సభ్యుడిగా ఉన్న రమణ దీక్షితులను ఆలయ గౌరవ ప్రధాన అర్చకుడిగా నియమిస్తూ మండలి తీర్మానించింది. వైకుంఠ ఏకాదశి రోజున వీఐపీలకు దర్శన సమయం కుదించి సామాన్య భక్తులకు పెద్దపీట వేయనున్నట్లు తితిదే తెలిపింది.

శ్రీవారి ఆలయ గౌరవ ప్రధాన అర్చకుడిగా రమణ దీక్షితులను నియమిస్తూ తితిదే ధర్మకర్తల మండలి తీర్మానించింది. వైకుంఠ ఏకాదశి సందర్భంగా తిరుమల శ్రీవారి ఆలయంలో రెండు రోజుల పాటు వైకుంఠ ద్వారాలు తెరిచి ఉంచనున్నట్లు తితిదే ధర్మకర్తల మండలి ఛైర్మన్​ వై.వి.సుబ్బారెడ్డి తెలిపారు. గత సంప్రదాయాన్నే ఈసారీ కొనసాగించనున్నట్లు పేర్కొన్నారు. తిరుపతి అన్నమయ్య భవనంలో దాదాపు 5 గంటల పాటు జరిగిన ధర్మ కర్తల మండలి సమావేశంలో తితిదే పలు కీలక నిర్ణయాలు తీసుకుంది.

సామాన్య భక్తులకు ప్రాధాన్యం

ప్రోటోకాల్​ పరిధిలోని వీఐపీలకు వైకుంఠ ఏకాదశి రోజున గతంలో కంటే అరగంట సమయం కుదించామని.. సామాన్య భక్తులకు అధిక ప్రాధాన్యం ఇచ్చి శ్రీవారి దర్శనం కల్పిస్తామని ధర్మ కర్తల మండలి ఛైర్మన్​ వైవి సుబ్బారెడ్డి తెలిపారు.

ముఖ్య తీర్మానాలివీ

⦁ 2019-20 ఆర్థిక సంవ్సరానికి తొలుత రూ.3016.25 కోట్ల వ్యయంతో బడ్జెట్​ రూపొందించారు. సవరించిన అంచనా ప్రకారం రూ.3243.19 కోట్లకు పెంపు.

⦁ జమ్ము, వారణాసిల్లో శ్రీవారి ఆలయాల నిర్మాణానికి తీర్మానం

⦁ ముంబయిలో రూ.30 కోట్ల వ్యయంతో వెంకటేశుని ఆలయ నిర్మాణానికి ఆమోదముద్ర

⦁ తితిదేలో ప్రత్యేకంగా సైబర్​ భద్రతా విభాగం ఏర్పాటు

⦁ తిరుమలలో వచ్చే సంక్రాంతి నుంచి ప్లాస్టిక్​ బాటిళ్ల వాడకంపై నిషేధం అమలు

⦁ తిరుపతిలో టాటా ట్రస్టుకు కేటాయించిన భూమి లీజును 33 నుంచి 30 ఏళ్లకు కుదింపు

⦁ తిరుపతిలోని బర్డ్​ ఆస్పత్రి డైరెక్టర్​గా మదన్​మోహన్​రెడ్డి నియామకం

⦁ భక్తుల మనోభావాలను దెబ్బ తీసేలా పత్రికల్లో వచ్చిన కథనాలపై పరువు నష్టం దావా వేయాలని తితిదే ధర్మకర్తల మండలి

నిర్ణయించింది.

శ్రీవారి క్యాలెండర్ల కొరత

తిరుమల శ్రీవారి భక్తులకు పూర్తి స్థాయిలో క్యాలెండర్లు, డైరీలు అందడం లేదు. ఏటా డిసెంబరు మొదట్లోనే తితిదే వీటి విక్రయాలను మొదలు పెడుతుంది. ఈసారి మాత్రం కొరత కారణంగా భక్తులు నిరాశకు గురవుతున్నారు. మొత్తం 6 లక్షల డైరీలకు గానూ ఇప్పటికీ 2 లక్షల డైరీలు మాత్రమే అందుబాటులోకి వచ్చాయి. దీనివల్ల విక్రయ కేంద్రాల వద్ద భక్తులు ఇబ్బందులకు గురవుతున్నారు. త్వరగా వీటిని అందుబాటులోకి తీసుకురావాలని కోరుతున్నారు.

ఇదీ చూడండి: