సీఎస్... చెవిరెడ్డి సెక్రటరీలా మారిపోయారు

చంద్రగిరి నియోజకవర్గంలో పోలింగ్ అక్రమాలపై తెదేపా అభ్యర్థి నాని ఫిర్యాదు చేస్తే కనీసం కన్నెత్తి చూడని ఈసీ.. చెవిరెడ్డి ఫిర్యాదుకు వెంటనే చర్యలు తీసుకుంది. భాజపాను అడ్డుపెట్టుకుని వైకాపా కుట్రలకు పాల్పడుతుంది అనే దానికి నిదర్శనం ఇదే: అనురాధ

రాష్ట్ర ప్రధాన కార్యదర్శి (సీఎస్) చెవిరెడ్డి సెక్రటరీగా మారారని తెదేపా అధికార ప్రతినిధి పంచుమర్తి అనురాధ విమర్శించారు. చిత్తూరు జిల్లా చంద్రగిరి నియోజకవర్గంలో పోలింగ్ అక్రమాలపై ఎన్నికల సంఘానికి కాకుండా సీఎస్​కు చెవిరెడ్డి ఫిర్యాదు చేయడం ఏంటని అమరావతిలోని మీడియా సమావేశంలో ఆమె ప్రశ్నించారు. ఆ నియోజకవర్గ తెదేపా అభ్యర్థి ఫిర్యాదును పట్టించుకోకుండా... వైకాపా ఫిర్యాదుకు ఆగమేఘాలపై చర్యలు తీసుకుంటున్నారని అన్నారు. గాంధీ మహాత్ముడిపై భాజపా నేతలు దారుణమైన వ్యాఖ్యలు చేస్తుంటే ఆ పార్టీ అగ్రనేతలు, ఎన్నికల సంఘం స్పందించదా అని అనూరాధ నిలదీశారు.