'వర్క్ ఫ్రం హోం' మోసాలకు పాల్పడుతున్న ముఠా అరెస్టు - పోలీసులు ఎలా పట్టుకున్నారంటే!

Cyber Scam In Anantapur District : ఈ రోజుల్లో సైబర్​ మోసగాళ్ల ఆగడాలకు హద్దులు లేకుండా పోతున్నాయని ప్రజలు విస్తుపోతోన్న విషయం విధితమే. పెరుగుతున్న టెక్నాలజీని అడ్డుపెట్టుకుని వారు చేస్తున్న మోసాలు అనేకం. `అనంతపురం జిల్లాలోనూ వర్క్​ఫ్రం హోం పేరుతో మోసపోయామని లబోదిబోమంటున్నారు బాధితులు. అసలు ఏం జరిగి ఉంటుంది. వర్క్​ఫ్రం హోం పేరుతో ఎలా బురిడీ కొట్టించారు అని ఆలోచిస్తున్నారా. అయితే మీరు ఈ కథనం చదవాల్సిందే...

Cyber Scam In Anantapur District :చదువు పూర్తయ్యిందంటే చాలు ఉద్యోగం కోసం ఎక్కడెక్కడికి వెళ్లాలో అని అనుకుంటారు కొందరు. ఇంటి దగ్గరే ఉండి సంపాదించే ఉద్యోగం అయితే బాగుండు అనుకుంటారు... అలాంటి వాళ్లే లక్ష్యంగా అనంతపురం జిల్లాలో సైబర్​ మోసం జరిగింది. రూ. 35 కోట్లు కొట్టుకెళ్లారు సైబర్​ కేటుగాళ్లు. అన్యాయం జరిగిందని, నష్టపోయామని గ్రహించిన బాధితులు పోలీసులను సంప్రదించారు. చదువుకున్న వారు కూడా గుర్తించలేని విధంగా మాయ చేయడం దారుణమంటున్నారు విషయం తెలిసిన స్థానికులు. వర్క్ ఫ్రం హోం ఉద్యోగాలిస్తామంటూ యువతను మోసం చేసి రూ.35 కోట్లు కాజేసిన సైబర్ నేరగాళ్లను అనంతపురం పోలీసులు పట్టుకున్నారు.

అసలు సైబర్​ నేరగాళ్లు ఏంచేశారంటే..?

Work From Home Cyber Scam In Ap 2023 :అనంతపురం జిల్లా గార్లదిన్నెకు చెందిన ఓ మహిళ ఇచ్చిన ఫిర్యాదుతో ఈ సైబర్ నేరం గుట్టు బయట పడింది. మొదట నిరుద్యోగులకు టెలిగ్రాం యాప్ ద్వారా లింక్ పంపి దాని నుంచి వారి వివరాలు తెలుసుకొని కొంత పని అప్పగిస్తారు. పని పూర్తయ్యాక రూ.20వేల నుంచి రూ.30వేల రూపాయలను బాధితుడి ఖాతాలకు బదిలీ చేస్తారు. బాధితుని ఖాతాలో సొమ్ము కనిపిస్తుంది కాని, విత్ డ్రా చేసుకొనే అవకాశం లేకుండా చేస్తారు. కొందరికి మాత్రం విత్ డ్రా చేసుకొనే వెసులుబాటు కల్పిస్తారు. ఎక్కువ పని చేస్తే అధిక ఆదాయం పొందవచ్చు అని నమ్మకం కల్పిస్తారు. మధ్యలో పని వదిలేయకుండా పదిశాతం నగదును డిపాజిట్ చేయాలని సూచిస్తారు.

Anantapur Police Find Cyber Criminals : బాధిత మహిళ ఇచ్చిన ఫిర్యాదు మేరకు దర్యాప్తు చేసిన పోలీసులు నిందితులను పట్టుకున్నారు. వారి దగ్గర నుంచి సమాచారం సేకరించారు. ఈ క్రమంలో ఇలా వసూలు చేసిన మొత్తం నెల్లూరులోని ఓ బ్యాంకు ఖాతాకు, అక్కడి నుంచి దేశవ్యాప్తంగా 11 షెల్ కంపెనీల 172 ఖాతాలకు మళ్లించినట్లు అనంతపురం పోలీసులు గుర్తించారు. నెల్లూరు బ్యాంకు ఖాతా ద్వారా రూ. 35 కోట్ల రూపాయలు బదిలీ చేసినట్లు గుర్తించిన పోలీసులు లావాదేవీలు నిలిపివేశారు. బాధిత యువతను సైబర్​ నేరగాళ్లు వలలో వేసుకున్న తీరుకు ఆశ్చర్యం వ్యక్తం చేశారు. ఇటువంటి వాటిని నమ్మి ఎవరూ మోసపోవద్దని పోలీసులు సూచించారు. సంస్థ పూర్తి వివరాలు తెలుసుకోకుండా పెట్టుబడులు పెట్టి నష్టపోవద్దని హెచ్చరించారు.