అశ్విన్ పని అయిపోయినట్లేనా?

కుల్​దీప్​ యాదవ్​, చాహల్ నిలకడగా రాణిస్తూ... జట్టులో అశ్విన్ లేని లోటును పూడుస్తున్నారు.

భారత్ స్టార్ స్పిన్నర్ రవిచంద్రన్​ అశ్విన్​ టెస్టు మ్యాచ్​ల్లో ఇంక కనిపించడా? రవిశాస్త్రి వ్యాఖ్యలు చూస్తే నిజమే అనిపిస్తుంది. 'టెస్టుల్లో కుల్​దీప్​ యాదవ్, అశ్విన్ ఇద్దరిలో ఒక్కరినే ఎంపిక చేయాల్సి వస్తే చైనామన్​కే ప్రాధాన్యతనిస్తాం' అని టీమిండియా కోచ్ రవిశాస్త్రి చెప్పకనే చెప్పాడు. ఫలితంగా, అశ్విన్ ఇక టెస్టుల్లోనూ ఆడకపోవచ్చనే సంకేతాలు వినిపిస్తున్నాయి.
ఇప్పటికే వన్డే జట్టులో చోటు కోల్పోయాడు ఈ తమిళ స్పిన్నర్. ఏడాదిన్నర కాలంగా వన్డే, టీ20లకు దూరమయ్యాడు రవిచంద్రన్. పరిమిత ఓవర్ల క్రికెట్​తో పాటు టెస్టుల్లోనూ కుల్​దీప్​ యాదవ్​, యజువేంద్ర చాహల్ నిలకడగా రాణిస్తున్నారు. విదేశాల్లోనూ అద్భుత ప్రదర్శనతో ఆకట్టుకుంటున్నారు.
అశ్విన్ స్వదేశంలో మెరుగ్గానే రాణిస్తున్నా...విదేశాల్లో చెప్పుకోదగ్గ ప్రదర్శన చేయలేదు. 64 టెస్టుల్లో 25 సగటుతో 336 వికెట్లు తీసిన ఈ వెటరన్ స్పిన్నర్ ఇటీవలి ఆస్ట్రేలియా పర్యటనలో కేవలం ఒకే టెస్టు ఆడాడు.
గాయం కారణంగా జట్టుకు దూరమైన అశ్విన్ స్థానంలో ​కుల్​దీప్​ని తీసుకున్నారు. కంగారూల గడ్డపై తొలిసారి ఆడిన చైనామన్ 99 పరుగులిచ్చి 5 వికెట్లు తీసి భారత్ విజయంలో కీలకపాత్ర పోషించాడు. 6 టెస్టుల అనుభవమే ఉన్న ఈ వర్ధమాన క్రీడాకారుడు 24 వికెట్లు పడగొట్టాడు. 38 వన్డేల్లో 77 వికెట్లతో దూసుకెళ్తున్నాడు.